Senior citizen wards sa mga tambalanan

CEBU, Philippines - Daghang ospital ang maglisod pagtuman bisan kun ang dakbayan sa Sugbo magmugna pa og ordinansa nga pugson sila paghimo’g “exclusive ward” alang sa mga senior citizens.

Si Dr. James Alesna sa Vicente Sotto Memorial Medical Center (VSMMC)  miatubang sa konseho ug mipasabot nga dili sila supak apan wala sila’y budget nga magamit pagmugna og special ward sa mga tiguwang.

Matud ni Alesna nga sa VSMMC ang mga pasyente moabot na gani usahay sa lobby sa ospital tungod kay kuwang sila og wards nga magamit. Ang VSMMC gihimo alang ra unta sa 800 ka pasyente apan pagkakaron ang maong ospital moserbisyo og tag 1,400 ka pasyente mao nga usahay mabantayan nga dunay higdaanan nga ukopahon og duha o tulo ka tawo. Si Dr. Alesna usa sa gidapit sa konseho sa dakbayan sa Sugbo sa pagtambong sa gipahigayong public hearing kabahin sa gisugyot nga ordinansahon ni Konsehal Edgardo Labella nga mag-require sa tagdumala og government ingon man private hospitals nga magmugna og special wards sa mga senior citizens.

Gipasabot ni Alesna nga hasol usab kaayo ang paghiusa sa tanang mga senior citizens sa usa lang ka ward tungod kay dili managsama ang kahimanan nga gamiton alang kanila.

Sa iyang bahin si Dr. Eli Belarmino sa Visayas Community Medical Center miingon nga andam sila nga motuman sa ordinansa nga iyang gihulagway nga maayo ang tumong.

Si Belarmino nga usa na usab ka senior citizen miingon nga dili maayo nga babagan ang tinguha ni Labella. Si Dr. Gloria Duterte nga director sa Cebu City Medical Center (CCMC) miingon nga dili siya supak apan ang problema mao ang kakuwang nila og dapit nga kahimoan sa gisugyot nga special ward sa mga senior citizens. (BANAT NEWS)