Sakpang may laing kadulog

CEBU, Philippines - Diriyot mapatay sa usa ka lalaki ang laing lalaki nga nasakpan niyang gikadulog sa iyang kapuyo kagahapon sa kaadlawon diha sa usa sa mga barangay sa dakbayan sa Talisay.

Ang babaye ug ang ‘kulokadidang’ niini nagtingkagol karon sa Talisay City detention cell.

Ang biktima nga usa ka driver sa usa ka schoolbus misumbong sa iyang kahiubos batok sa iyang kapuyo ug sa giingong 23-anyos nga ka-relasyon niining lalaki ngadto kang Inspector Margienett Yosores sa Talisay City Police Station Women and Children Protection Desk.

Sa imbestigasyon ni Inspector Yosores nga ang mireklamong bana-bana nag-edad og 30-anyos nagduda nang daan sa iyang 26-anyos nga kapuyo nga usa ka promodiser, tungod sa dili maayong tinagdan niini ngadto kaniya niining ulahi lang.

Adunay duha ka mga anak ang duha nga nagpanuigon og walo ug pito ka tuig.

Matud pa sa lalaki dunay panahon nga mananghid nga mosimba ang babaye sayo sa buntag apan hapon na kaayo nga mo-uli.

Apan aron walay samok wala lang kini sukit-sukita sa mireklamong bana-bana ug nag-concentrate sa iyang trabaho ug sa ilang mga anak.

Gikataho usab nga nabantayan sa biktima ang iyang kapuyo nga bisan og gikan kining manglaba magbutang og pahumot ug kanunay na siya niining awayon bisan walay hinungdan.

Niadtong Biyernes, gipalayas sa babaye ang reklamante ug gipadala pa ang ilang mga anak. Ang manag-amahan adto mihigda sa panimalay sa iyang mga ginikanan.

Apan alas 12:00 sa tungang gabii nianang gabhiuna, gibati siya og grabeng kakulba maong miuli kini ngadto sa ilang panimalay.

Pag-abot niya diha sa ilang balay kalit niyang gipatiran ang pultahan ug maoy nasugat sa iyang panan-aw ang iyang kapuyo ug ilang silingang lalaki nga nagdulog ug parehong walay mga sinina.

Sa kalagot sa biktima kutob sa magunitang gamit gilabay niya ngadto sa “kulokadidang” sa iyang kapuyo hangtud nga nakagunit siya og  kutsilyo apan napugngan siya sa iyang kapuyo.

Ang batan-ong lalaki midagan apan gigukod kini sa reklamante hinungdan nga mi-apil og gukod ang mga estambay ug mga drayber sa habal-habal hangtud nga nasignit ang lalaki.

Gi-turnover nila ang lalaki sa mga tanod ug mao nay mitugyan niini ngadto sa mga polis, samtang ang babaye gidala sa bana-bana didto sa police station.

Si Yosores nagkanayon nga nagplanong mopasaka og kaso batok sa mga suspetsado ang bana-bana karong Lunes, apan gitun-an pa kung unsay kasong mapasaka tungod kay dili kasado ang duha.  (BANAT NEWS)