88 nagkalibanga sa Carmen

CEBU, Philippines - Niabot og 88 ka tawo ang nabiktima sa kalibanga sa  hapit tanan sa 21 ka barangay sa lungsod sa Carmen, amihanang bahin sa lalawigan sa Sugbo, sukad niadtong Pebrero 13.

Matud pa ni provincial health officer, Dr. Cristina Giango, nga ang katapusang tulo ka biktima gikataho niadtong Huwebes base sa report sa iyang mga sakop nga nisusi sa dapit.

Ang mga pasyenti gisusi sa Danao District Hospital ug sa Carmen Rural Health Unit aron pagsuta sa hinungdan sa ilang balatian.

Dili hinoon maisip nga “outbreak” ang maong kaso sumala pa ni Giango bisan og dunay pagsaka sa gidaghanon niini.

Matud pa niya nga duha ka chlorinators ang ila na nga napataud sa tinubdan sa tubig nga gituohang natakbuyan og kagaw hinungdan sa kalibanga sa mga residenti.

Girekomendar usab ang pagpailis sa mga tubo gikan sa tinubdan sa tubig sa Uragay.

Sa pagkakaron, ang mga residenti gimandoan nga pabukalan una ang tubig sulod sa 30 minutos sa dili pa imnon aron pagseguro nga luwas na kini sa kagaw.

Ang mga biktima nagpangedaron gikan sa tulo ka buwan ngadto na sa 64 anyos.

Kadaghanan sa mga apektado mao ang nagpangedaron og ubos sa usa ka tuig hangtud sa 10 anyos.

Mga apektadong pamilya nagagikan sa 18 ka barangay samtang ang barangay Luyang ang may labing daghan nga niabot og 27 ka kaso. Nasuta nga kadaghanan sa mga biktima tiggamitan sa tubig sa Uragay waterworks.

Ang Provincial Epidemiology and Surveillance Unit (PESU), Danao Provincial Hospital ug Carmen RHU ang nagtabangay na karon sa pagmonitor aron dili na madugangan ang mga pasyenti.

Nangapod-apod usab sila og mga medisina ug mga tambal alang sa mga pasyenti. Ang tubig sa Uragay nga modagayday padulong sa sapa sa Luyang mao ang gamiton sa P700 milyones nga Carmen bulk water project nga ipatuman sa kagamhanan sa lalawigan sa Sugbo ug sa Manila Water Consortium. (BANAT NEWS)