Level 3 drug pusher tiklo

CEBU, Philippines - Nasikop sa kapolisan sa Regional Anti-Illegal Drugs Special Task Group (RAIDSOTG) uban sa kapolisan sa dakbayan sa Talisay ang managsuong babaye kinsa giingong namaligya og gidiling drugas didto  sa sitio Zone 4 Isla Verde, barangay San Isidro dakbayan sa Talisay, kagahapon.

Ang nasikop mao sila  si Calixta Villaber Empaces ug Helen Villaber Sanchez, pulos  hingkod, ug molupyo sa maong lugar  kinsa  nasakmitan  og  duha  ka pakete  nga gituohang  shabu. Ang pagkasikop  nahimo human  madawat  sa mga   sakop  sa  RAIDSOTG   ang taho  kalabot sa pagnegosyo  og  shabu sa magtiayong Calixta ug Arturo Empaces sa maong lugar.

Hinungdan nga mipahigayon dayon  ang  mga  polis  og “ test buy”  makatulo ka higayon  ngadto  sa  mga  suspek  ug  gisundan  dayon  kini og  buybust  operation.

Ang  police  decoy   maoy  mipalit og shabu  nga bali  og  P500  ngadto sa magtiayon ug sa igsoon niini.

Apan si Arturo   nga  bana  ni Calixta kinsa nakabantay nga polis   ang namalit  og  shahu kanila mikabad  kini  og  dagan pahilayo  sa ilang  balay.

Si Calixta  ug  ang  igsoon niini  nga  Helen maoy  gisikop   sa kapolisan.

Nasakmit  sa mga otoridad  gikan  kanila  ang duha ka medium pack  nga gituohang shabu nga gibana-banang nagkantidad og   P50 mil,  ug laing unom ka gagmay’ng pakete sa maong  matang sa  drugas, weighing scale, ug P560  nga gituohang halin sa ginadiling drugas. Ang team leader sa maong operasyon nga si Ins. Armando Labora, mibutyag nga taud-taud silang naniid  sa kalihokan sa mga suspek. Gihulagway usab ni Labora nga ang magtiayon makapagawas og tag-25 gramos nga shabu kada semana busa  giisip  sila  nga level 3 drug  pusher.

Sa pagkakaron  gitanggong  na  sa prisohan  ang  mga  dinakpan  ug nagpaabot  sa tukmang  kaso  nga  ipasaka  batok kanila. (BANAT NEWS)