Lider ni Sonny o gipatay

CEBU, Philippines - Gipusil patay ang political leader ni kanhi senador Sonny Osmeña   sa duha  ka  mga  kriminal  nga nag-motor samtang paingon kini  sa  pulong pulong didto sa Sitio Sipawan, barangay Luray-2, siyudad sa Toledo kagahapon sa alas 10:45 sa buntag.

Ang biktima  giila  nga  si Orencio Embrahilag alyas Rene, 42, minyo,   kanhi  kagawad sa barangay Captain Claudio   sa maong  dakbayan, ug  usa sa mga  lider  ni kanhi senador Osmeña.

Si  Osmeña   kandidato karon  sa  pagka- mayor sa  dakbayan  sa Toledo  nga  kaatbang ni Mayor Aurelio Espinosa.

Ang  mga  saksi  mibutyag  sa  kapolisan  nga  duha ka tawo  nga nagsakay  og  motorsiklo nga Honda XRM kolor puwa  maoy  miluthang  sa biktima.

Si SPO4 Gil Lastimosa, desk officer sa Toledo City Police   Station  mibutyag  sa Banat News   nga ang biktima  nagsakay  usab  sa iyang  motorsiklo gikan sa CEBECO-3  ug pag-abot sa maong lugar gipusil  kini sa nag-backride  sa motorsiklo  nga nagsunod  ikaniya.

Natusak  sa mga bala  ang  buko-buko  sa biktima  nga maoy  hinungdan  sa kamatayon  niini.

Dihang  natagak   na sa  iyang  motorsiklo,  mihunong  usab  sa pagpamusil  ang  mga  kriminal  dayong  pahilayo  niini  ug  gibiyaan  ang  biktima

Ang biktima dali   nga gihatud   sa  mga nakasaksi  ngadto sa Toledo City District Hospital diin  kini   gideklarar nga dead on arrival (DOA).

Samtang gibutyag ni Florencio Soronio, 60, minyo taga barangay Das Lutopan,  sa maong  dakbayan kinsa  kauban  usab  nga  lider sa  biktima   nga sa maong  higayon  magpahigayon unta sila og miting apan  wala  makaabot  ang  biktima tungod  sa  nahitabo  kaniya. Ang biktima dugang ni Soronio nga gawas sa pagka  lider niini  sa  politika, sakop usab  sa anti crime volunteer group sa  Toledo. Ang kapolisan nagsubay   na karon sa tanang anggulo aron matumbok ang motibo sa maong  krimin.  (BANAT NEWS)