Nangita’g lalis napusilan
CEBU, Philippines - Usa ka 38-anyos nga lalaki kinsa giingong nangita og lalis ang nalandig sa tambalalan human kini pusila niadtong Martes sa gabii diha sa sitio Puwa, barangay San Isidro, dakbayan sa Talisay.
Ang biktima mao si Condrado Cuizon, minyo, nagpuyo sa maong lugar ug ang suspetsado mao ang silingan niini nga si Roger Resuena alyas “Jong-jongâ€, 56-anyos kinsa misibat human sa hitabo.
Sa imbestigasyon ni SPO1 Edgar Causon nga sa wala pa mahitabo ang pagpamusil si Cuizon giingong miadto kini sa balay ni Resuena.
Samtang si Cuizon diha sa sulod sa balay ni Resuena giingong ang biktima nanghagit kini sa suspetsado. Apan wala ibutang sa blotter sa polis kung unsay hinungdan o rason sa biktima sa pagpanghagit niini ngadto sa suspetsado.
Aron malikayan ang kasamok giingong si Cuizon gipagawas kini sa ubang tawo diha sa balay. Ang biktima giingong gipusil sa suspetsado dihang nakadistansiya na kini og 25 metros gikan sa balay.
Ang biktima nga nakaangkon og samad pinusilan sa ibabaw’ng bahin sa lawas dali kining gidala ngadto sa Talisay City District Hospital apan gibalhin ngadto sa Vicente Sotto Memorial Medical Center. (BANAT NEWS)
- Latest
