Polis mipasok simpak sa kinatawo sa iyang asawa?

CEBU, Philippines - Polis nga nadistino sa dakbayan sa Mandaue gipasanginlan nga midagmal sa iyang asawa ug mipugos pagpasok og simpak sa cell phone sa  kinatawo niini.

Usa ka silingan sa maong polis maoy mitug-an ngadto sa media sa giingong pagpangabuso sa maong polis ngadto sa iyang asawa nga iya na nga gibiyaan.

Ang mireklamo mihatag sa ngalan sa maong polis apan nahukman sa Banat News nga dili lang usa ibutyag ang  ngalan niini samtang wala pa’y pormal nga reklamo.

Wala ibutyag sa inpormer kun ngano nga nasayud siya nga gipugos pagpasulod sa polis ang simpak sa cell phone  ngadto sa kinatawo sa iyang asawa. Base sa balaod ang hingtungdang asawa makapasaka og reklamo batok sa iyang bana pinasikad sa lagda nga gilatid sa Republic Act 9262, kon Violence Against Women and their Children Act.

Ang record sa kapolisan nagpakita nga ang maong polis nadistino kaniadto sa Cebu Provincial Police Office (CPPO) sa wala pa siya mabalhin sa dakbayan sa Mandaue.

Si CPPO director Patrocinio Comendador miingon nga taud-taud na nga ang maong polis dinhi madistino sa Sugbo.

Ang kapolisan  sa Mandaue direkta nga ubos sa pagdumala sa Police Regional Office (PRO)-7 ug kun ang iyang asawa moreklamo sa giingon nga pagpangabuso, adto na siya makapasaka og reklamo sa Regional Internal Affairs Service. Ang inpormer nagkanayon nga ang maong polis mibiya sa iyang asawa ug nakigtipon na sa laing babaye.

Gusto sa informant nga ang kadagkoan sa kapolisan moimbistigar sa abuso nga  gihimo sa ilang sakop.

Si Comendador miingon nga labing maayo nga kun tinuod nga mihimo’g pagpangabuso ang maong polis nga nagranggo og PO3, mopasaka gayud siya’g reklamo. (BANAT NEWS)