Brgy Tanod gi-aping pagpusil

CEBU, Philippines - Naangol ang usa sa mga sakop sa Barangay Safety Public Office (BSPO) o barangay tanod sa Purok Tambis,  barangay Gun-ob, dakbayan sa Lapulapu human  kini  pusila sa  aping   sa wala hiilhing   mga criminal  samtang naglakaw  siya  pauli  sa ilang  balay sa miaging gabii.

Ang biktima mao si Ruben Potot, 48 , minyo nga nagpuyo   sa Purok  Tambis.

Si PO1 Jade Quiroben sa homicide section sa kapolisan sa maong dakbayan miingon nga nag-inusara lamang nga naglakaw sa maong lugar ang biktima  gikang  mibilar  sa haya  sa  uyoan  niini.

Dugang pa niya nga sa pag-abot sa biktima sa awaaw nga dapit paingon sa ilang  balay kalit  nga mitumaw ang duha ka wala hiilhing lalaki ug gipusil  ug walay  daghang  estorya kalit  nga gipusil  ang biktima sa makadaghang higayon.

Ang ulo unta sa biktima maoy   gidul-itan  sa armas de fuego    apan abtik    kining  nakalihay  busa  didto  sa aping  motugpa  ang  bala.

Matud pa ni PO1 Quiroben nga ang duha ka wala hiilhing   kriminal  dali    kaayong  nakasibat   pahilayo sa maong dapit   samtang  ang biktima  gidala  usab  dayon  ngadto sa Lapulapu City Hospital apan gibalhin kini ngadto sa Vicente Sotto Memorial Medical Center sa dakbayan sa Sugbo.

Padayon  pa  nga gipangita  sa kapolisan  ang  mga kriminal. (BANAT NEWS)