BEI automatic makadawat sa honoriaum

CEBU, Philippines - Gitakdang madawat  dayon sa mga magtutudlo nga moalagad isip Board of Election Inspectors (BEIs)  karong umaabot nga piniliay  ang  ilang  honorarium.

Gikutlo  sa  mga  opisyal sa Comelec dinhi  sa rehiyon  7 ang  pamahayag ni Commission on Elections (COMELEC) Chairman Sixto Brillantes Jr., kinsa  nagkanayon  nga kun mahuman na ang mga magtutudlo sa ilang trabaho sa umaabot nga piniliay, ihatag gilayon ngadto kanila ang bayad pinaagi sa cash card o mahimo usab nilang i-withdraw sa mga ATM outlet.

Sa miaging piniliay pinaagi sa cash lamang ang gibayad sa COMELEC ngadto sa mga BEIs diin may mga insidente nga giingong may  uban  nga nawagtang  ug  wala makaabot ngadto sa mga magtutudlo.

Nakig-alayon na ang Comelec sa Land Bank of the Philippines alang sa usa ka Memorandum of Agreement (MOA), diin adto niini  i-deposito ang kwarta nga alang  sa  mga BEI.

Adunay 240,000 ka mga magtutudlo nga moalagad sa piniliay sa Mayo 13 ug matag usa kanila makadawat og P4,000 allowance alang sa ilang poll duties.

Gibansaybansay na sa COMELEC ang mga trainor nga maoy ipakatap sa tibuok nasud aron maoy mobansay usab sa mga magtutudlo.

Bansayon usab ang mga BEI sa teknikal nga aspeto sa piniliay aron masiguro nga bisan usa man lamang sa tulo ka magtutudlo nga ibutang sa matag  usa  sa 77,829 gitipontipon  o clustered precinct, adunay teknikal nga kahibalo sa pagmaneho sa mga PCOS machine.

Sugdan na usab sa COMELEC ang ilang voters’ education sa unang semana sa Marso. (BANAT NEWS)