Usa patay sa bagyong Crising

CEBU, Philippines - Usa ka tawo na ang nakalas gumikan sa pagkalumos didto sa New Bataan sa Compostela Valley sumala pa sa Office of Civil Defense Region 11.

Sumala pa ni Lisa Mazo sa OCD-11 sa report sa GMA News Online  usa ka  Francisco Digaynon Jr. ang nalumos dihang misuway kini og tabok sa sapa sa New Bataan.

Ang National Disaster Risk Reduction and Management Council nagkanayon duha ka tawo usab ang naangol sa landslide sa Lanao del Sur. Laing landslide usab ang nahitabo sa Barangay Malasalug sa lungsod sa Sapad sa Lanao del Norte ug usa ka balay ang natabunan. Ang mga naangol mao sila si Maria Nacua, 20; ug Dodong Nacua, 8, ug parehong gidala sa Lanao del Norte Provincial Hospital sa Kapatagan.

Dose usab ka domestic flights ang nakanselar hinungdan sa pagka-stranded sa mga pasahero diha sa Ninoy Aquino International Airport ug ubang tugpahanan sa nasud nga may flights padulong sa Cagayan de Oro ug mga lugar nga naapektahan sa bagyong Crising.

Gibahaan na usab ang mga kalungsoran sa Caraga, human motugpa ang bagyo sa Davao del Sur.

Ang bagyong Crising sumala pa sa PAGASA adunay hangin nga 45 kph  ug nag-irog sa west-northwest sa gikusgon nga 22 kph. (BANAT NEWS)