7K call center workers gikinahanglan sa Dumaguete

DUMAGUETE CITY, Philippines – Dugang siyete mil ka trabaho sa call center industry ang gipaabot nga mahatag sa bag-ohay lang giablihang Qualfon, nga usa ka business process outsourcing (BPO) ug call center service provider sa Dumaguete.

Pormal nga giugbok kagahapon ang marker sa Link Sy IT Park diin gikatakdang tukoron ang bag-ong call center building sa Qualfon sumala pa sa director sa maong kompanya nga si  Scott Warner.

Sa pagkakaron, ang Qualfon maoy dunay labing daghan og call center agents sa Dumaguete tungod sa 3,000 niini ka mga trabahante. Gipaabot nga kung matapos na ang ikaduhang site niini, dugang 7,000 ka trabahante ang ilang kuhaon matud pa ni Warner.

Samtang wala makaabot si Presidente Benigno Simeon Aquino III sa seremonya sa pagbukas sa marker isip pinasidunggang dinapit tungod sa dautang panahon dala sa bagyong Crising.

Girepresentahan hinuon siya sa iyang ig-agaw nga si Bam Aquino ug Senador Franklin Drilon.

Matud pa ni Warner, mas gipili niya ang Dumaguete City tungod kay mas barato ang overhead costs apan parehong de kalidad nga customer service ang ilang mahatag sa ilang mga customer.

Gidayeg usab ni Warner  ang kahanas sa mga taga Dumaguete sa pinulongang English  diha sa Qualfon- Dumaguete ug nalipay sa ‘work ethics’ sa mga trabahante. (BANAT NEWS)