Acetylene Gang misakiyo sa P2.5M nga alahas sa pawnshop

BACOLOD CITY, Philippines — Usa ka pawnshop ang nabiktima sa Acetylene Gang ug nasakiyo ang P2.5-million nga kantidad sa mga alahas.

Gituohang nahitabo ang pagpanglungkab niadto lang adlaw nga Domingo apan nadiskubrehan niadtong adlaw nga Lunes atol sa pagpangabli sa Prenda Negrense Pawnshop and Jewelry Store diha sa Luzuriaga St.sa  Bacolod City.

Matud pa ni Superintendent Santiago Rapiz, ang operations chief sa Bacolod City Police Office duha ka mga lalaki ang ilang gidudahang mihimo niini.

Ang maong duha ka mga lalaki matud pa mga Tagalog –speaking nga mi-check in sa Ong Bun Pension House niadtong Pebrero 13, ang duha mi-checkout niadtong Pebrero 17 adlaw nga Domingo. Ang maong pension house tupad lang sa maong pawnshop.

Sumala pa nga duha ka lawak ang girentahan sa duha, usa sa ground floor ug usa sa ikaduhang andana. Ug didto naghimo og lungag ang duha aron makalusot sa rooftop sa usa ka hardware store ug gibangagan kini padulong sa pawnshop.

Sumala pa ni Rapiz, naablihan sa mga kawatan ang vault ug gihurot ang sulod nga mga alahas.

Matud pang Rapiz dako kaayo ang posibilidad nga mga sakop sa Acetylene Gang ang grupong miigo sa maong pawnshop. “We largely believe they are part of the Acetylene Gang. They were professionals and the robbery was well-planned,” matud pa niya.

Bisan ang burglar alarm system sa maong pawnshop wala mosaler sa mga kawatan ug wala gani hilabti ang closed circuit television camera nga sumala pa sa management gubaon nang daan. Ang maong alarm system matud pa sa tagdumala mitingog niadtong Domingo.

Nasuta usab ni Rapiz nga ang mga gamit sa mga kawatan anha ra gipamalit sa mga tindahan sa siyudad  kini base sa mga resibo nga ilang nakuha diha sa mga lawak sa mga kawatan.

Ang mga trabahante sa Golden Hope Trading Inc. Tupad sa maong pawnshop maoy nakabantay sa naguba na nga bungbong sa katupad nilang pawnshop gikan diha sa sulod sa ilang establisamento.

Ang tag-iya sa maong pawnshop mao si Johnny Chua, kinsa napusilan patay niadtong Oktubre 25, 2012 samtang sakay sa iyang sakyanan diha sa dalan JV-Burgos sa Bacolod. (BANAT NEWS)