Sunog! kombira sa kasal naugdaw

CEBU, Philippines - Gilamoy sa dakong sunog ang 16 ka mga panimalay lakip na ang unta reception sa usa ka bag-ohay nagpakasal kagahapon diha sa sitio Rennaisance sa barangay Bulacao sa siyudad sa Sugbo.

Sumala pa sa Bureau of Fire Protection sa Cebu City, ang alarma nadawat pasado alas-3 kagahapon sa hapon ug nakontrolar paglabay sa 24 ka minutos gikan pag-isa sa task force alpha ang alarma.

Usa sa mga nasunogan mao ang polis sa Cebu City Police Office nga si SPO1 Fortunato Manilang Jr., nasunog og apil ang iyang M16 armalite rifle nga dunay nagtangag nga magazine.

Samtang walay swerte ang pagsaulog sa kasal sa groom nga si Dionisio Maremon human naapil og kasunog ang ilang balay diin unta ang ilang hikay himuon.

Matud pa ni Dionisio Maremon sa dihang nahinabi sa Banat News nga nagsugod na unta ang kombira dihang miulbo ang sunog ug nagdinaganay ang mga tawo.

Samtang hilabihan usab nga nakatiyabaw ni Emily Rodinas human naabo ang ilang panimalay. Matud pa niya nakabantay siya sa grabeng ka-alimuot ug nanimahong sunog ug sa iyang pagsusi sa gawas nasunog na diay ang balay sa ilang silingan.

Ang sunog giingong naggikan sa panimalay sa usa ka Francis Tagalog ug gisusi pa sa mga arson investigators ang hinungdan niini.

Matud pa ni SFO3 Jovito Abelgas nga nahinabi sa Banat News nga wala sila maglisod sa pagtubag sa maong alarma kini tungod kay adlawan ug adunay fire hydrant sa lugar ug daplin usab kini sa karsada.

Nasuta usab nga nalangay ang pagresponde sa mga bombero kay imbes nga itawag sa telepono gidagan ra kini sa tawong mipahibalo bahin sa emerhensiya diha sa Pardo Fire

Sub- Station.  (BANAT NEWS)