Citom way supak CCTV itaod sa eskina Katipunan ug Salvador

CEBU, Philippines - Walay pagsupak ang kadagkoan sa City Traffic Operations Management (CITOM) nga ang mga opisyal sa Labangon magbutang og upat ka Closed Circuit Television-Camera (CCTV) diha sa eskena Katipunan ug Salvador Streets.

Si CITOM executive officer Rafael Christopher Yap miingon nga ilang giuyonan ang hangyo sa mga opisyal sa Labangon nga tugotan sila nga makataud sa ilang CCTV camera sa matag kilid sa traffic lights.

Ang Barangay Labangon maoy mogasto sa pagpalit og CCTV camera ug sa pagpataud niini apan nananghid lang sila sa CITOM nga katugotan nga ang maong mga camera anha ibutang sa traffic lights.

Si Yap mitug-an sa City Council nga wala’y pagsupak ang CITOM Board sa maong hangyo sa Labangon apan ubos sa kondisyon nga kun ang dakbayan makapalit na og CCTV camera ang maong mga CCTV camera sa Labangon idugtong nila sa linya sa dakbayan.

Gusto ni Labangon Barangay Kapitan Victor Buendia nga kabutangan og CCTV camera ang eskena Katipunan ug Salvador Streets kay aron makatabang kini sa kapolisan sa pag-imbistigar kun dunay mga krimen nga mahitabo sa maong dapit. (Rene U. Borromeo/WC)

Kawata’g  metro sa tubig  mihasi  sa  norte

Ni Romeo T. Limpangog

Ang mga kawatan og metro sa tubig padayon nga   mihasi  sa  mga  molupyo  sa Liloan  ug Consolacion

Kini ang nasayran sa Banat News  gikan kang PO3 Jesson Gayo  kinsa miingon nga ang pagpanghasi sa mga kawatan og metro   sa tubig nakahasol na  kaayo  sa  mga  molupyo  sa maong  mga  lugar  ug  gani  usa  niini  ang  nadakpan  apan  nakagawas  usab  dayon  kay  nakapiyansa.

Matud pa niya nga kining subli nga pagtumaw sa  mga  kawatan og metro sa tubig ilang namatikdan  human  makagawas   sa bilanggoan  kadtong  ilang  nadakpan.

Gituohan nila nga mao  kining tawhana  gihapon  ang  nagpadayon  sa pagpangiriw  sa  ilang   mga metro  sa  tubig.

Si PO2 Jovanni Mabano sa kapolisan sa maong lungsod nga nahinabi sa Banat News miingon nga ang barangay Pitogo nga nahimutang sa utlanan nga bahin sa lungsod sa Liloan  gihasi  na  usab karon sa mga kawatan  og metro sa tubig. Gipanid-an  usab  sa kapolisan  kun kinsay  tigpamalit  og  mga kinawat  nga  metro  sa tubig  aron  mapasakaan  usab  nila  og  kaso.(BANAT NEWS)