Tabanog gidili duol sa linya sa kuryente

CEBU, Philippines - Ang tagdumala sa Visayan Electric Co. (VECO) mipasidaan sa mga kabataan ug mga residente  nga anaa mahimutang sa ilang coverage areas sa dili pagpalupad og tabanog  duol sa mga linya sa kuryente.

Sumala pa ni Theresa Sederiosa, Communications Manager sa  VECO nga usa kini ka paagi  nga makatabang ang publiko sa pagsiguro nga adunay malahutayong suplay sa kuryente atol sa eleksyon  karong  Mayo.

Base sa rekord sa VECO, ang  kadaghanang mahitabong pagkawala sa suplay sa kuryente maggumikan sa mga  pisi sa tabanog nga masangit sa linya sa kuryente  sa Veco

"Because a favorite summer activity here is kite-flying, we want to remind the schools, students, and barangay residents to practice safe kite-flying," kini matud pa ni Sederiosa.

Sumala pa niya  nga  ang mga tabanog kinahanglang anha ipalupad sa mga dapit nga halayo sa linya sa kuryente.

Ang umaabot nga piniliay sa Mayo 2013 ika- duha kini ka automated nga eleksyon sa nasud diin mahitabo sa panahon nga tingbakasyon o summer period.

Gipadayag ni Sederiosa nga ang VECO personnel mobisita sa mga barangay ug tunghaan sa ilang coverage areas gikan ning buwana  hangtod sa bulan sa Marso ning tuiga pag-edukar sa ilang mga konsumedor og kuryente isip parte sa ilang safety consciousness nga kampanya.

Si Sederiosa ug si Engr. Lowell Belciña, Resident Manager sa Cebu Electric Cooperatives (CEBECO) sa Cebu City Office, pulos miawhag sa mga konsumedor nga magmaigmat sa pagtaho sa ilang  mga  buhatan  kun  may  mga  panghitabo  nga  kadaot  sa  supply  sa kuryente  sa ilang tagsa-tagsa  ka  lugar ilabi  na  sa adlaw  sa piniliay.

"We cannot totally guard our electric lines all the time so please report to our office if there are trees that fell or about to fall on our lines in your areas, so we can address them before the election period," kini matud pa ni Belciña. (BANAT NEWS)