Lungkab himabaw’ng P500M ang nawagtang butang

CEBU, Philippines - Himabaw  sa tunga sa milyon ka pesos ang kantidad sa mga  butang nga nasakiyo sa wala  hiilhing kawatan  kinsa  milungkab  sa balay sa usa ka kawani sa National Grid Corportion (NGCP) didto sa barangay Veto sa lungsod sa Minglanilla   sa miaging  gabii.

Nadiskobrehan ang   maong   lungkab sa alas 9:30 sa gabii niadtong Sabado apan gituohan  nga  nahitabo  kini  nianang sayong bahin sa maong  kagabhion.

Ang biktima  nga  si Elisimo Abatol, 49, minyo, nagpuyo sa maong lugar ug nagtrabaho sa NGCP.

Samtang sa paghimo ning balita wala pay natumbok ang kapolisan nga responsabli sa maong pagpanglungkab.

Ang nasakiyo nga mga butang mao ang tulo ka laptap nga nagkantidad ang tanan og P140 mil, PSS computer software nga nagkantidad og P300 mil, ug  digital camera nga nagkantidad og P12 mil. Si PO1 Noel Mamale sa Minglanilla Police Station  mibutyag sa Banat News  nga ang biktima kauban sa pamilya niini nanuroy nianang  hapon  sa maong adlawan ug walay nahabilin sa ilang balay. Subay sa inisyal nga imbistigasyon  mikatkat  ang  kawatan  sa pader   sa balay  sa biktima ug dihang nakasulod na sa compound giguba ang window grill  ug gilaksi ang screen  ug  gipanangtang  ang  mga blade  sa jalousy  niini  busa didto  kini  moagi  hinungdan  nga   nakasulod    ngadto  sa balay sa  biktima  ug  nakahigayon  sa pagkiriw  sa  nahisgutang  mga  butang.

Nakugang nalang   ang biktima   nga  sa pag-uli  nila   nianang  alas 9:00  pasado sa gabii  nga nagkatag na  ang  ilang  mga  butang  sa hawanan  sa ilang  balay.

Apan  labing  naguol  ang  biktima  ug  ang  pamilya  niini  human  masuta  nga  gikawat  na  ang  ilang  mga  butang   nga nagkantidad  ang  tanan  og  himabaw  sa tunga  sa milyon  ka pesos. Padayon  pang  gipanid-an  sa kapolisan  ang  kawatan. (Darrel A. Carumba/WC)

Nakig-inom  sa   barkada giluba  angol

Ni Romeo T. Limpangog

Samdan ang  usa  ka  ulitawo  human  kini dunggaba  sa wala  hiilhing  kriminal  sa  diskohan  sa  barangay Kalawisan sa dakbayan sa Lapulapu sa miaging tungang gabii. Ang biktima mao si Arnel Bentulan, 18, ulitawo, nga taga sitio Iring, barangay Basak,  sa maong dakbayan. Si PO2 John Carlo Jocotan sa homicide section sa Lapulapu City Police Office (LLCPO) nga nahinabi sa Banat News miingon nga naglingkod lang ang biktima sa usa ka tindahan nga nahimutang sa gawas sa diskohan  nga  nakig-inom  sa iyang mga barkada. Dugang pa ni PO2 Jocotan nga samtang nagkukabildo kini sa mga barkada kalit lang miduol ang wala hiilhing lalaki ug   walay  daghang  estorya gidunggab   niini ang biktima.

Ang biktima nga naigo sa iyang aping misinggit og  panabang   busa  gihatud  dayon  kini  sa iyang  mga  barkada ngadto sa Lapulapu City Hospital apan  gibalhin  usab  dayon  kini ngadto sa Vicente Sotto Memorial Medical Center sa dakbayan sa Sugbo.

Si PO2 Jocotan miingon nga ang biktima nga iyang gisukitsukit mitug-an  nga wala usab kini makatimaan sa panagway sa suspetsado sanglit kalit kaayo ang maong hitabo. (BANAT NEWS)