School board sa Talisay gigahina'g P30 milyones

CEBU, Philippines - Kagamhanan sa dakbayan sa Talisay migahin og P30 milyones nga budget alang sa Local School Board niining tuiga. Si Talisay City Administrator Richel Bacaltos nagkanayon nga ang maong tinuig nga budget projection kini sa milabay’ng tulo ka tuig nga budget ug kung dunay mga surplus ang siyudad posibleng mapun-an kini.

Matud ni Bacaltos nga ang maong budget maoy kuhaan sa tanang mga galastohan sa mga tunghaang pampubliko sa siyudad sa kinder, elementarya ug high school. Usa sa gahinan og budget mao ang sweldohan sa 160 ka mga Teacher Aid Volunteer (TAV) diin matag usa niini magdawat og P8,000 nga sweldo matag buwan.

Base sa statement of fund operation sa LSB mikabat ngadto sa P9.6 milyones ang annual budget nga gigahin alang sa sweldo sa mga TAV.

Sa maong budget mipahak ngadto sa P11.5 milyones ang gahin nga pundo alang sa construction ug restoration sa mga school buildings sa Talisay City Central School, Lawaan III National High School, Pooc National High School, Vicente A. Manreal Elementary School, Mohon Elementary School ug San Roque Elementary School.

Mikabat ngadto sa P1.7 milyones ang gahin nga budget alang sa athletics/ Central Visayas Regional Athletics Association samtang P1.5 milyones ang gahin alang sa Sinulog sa Kabataan, P500 mil alang sa aid sa Palarong Pambansa ug P400 mil alang sa citizenship and cultural development.

Sa electricity expenses, repair and maintenance sa mga school buildings duna kini P600 mil nga pundong gigahin ug P141,451.25 ang gigahin alang sa construction sa fire exit stair sa Lawaan Elementary School.

Samtang mikabat ngadto sa P640 mil ang alang sa other structures diin naglangkub kini sa improvement sa Jaclupan National High School, improvement sa stage sa Talisay City Science High School, construction sa school drainage sa Tabunok Central School ug San Roque Elementary School, perimeter fence sa Maghaway Elementary School ug Tabunok National High School. Ang electrification sa Hawanay Primary School duna kini gahin nga P16 mil, samtang P150 mil alang sa instruction materials, P150 mil alang sa BSP ug GSP encampment ug DAMATH/MTAP.NDEP, P400 mil alang sa Talisay City Rondalla, Regional School Press Conference ug STEP regional ug national.

Sa City Wide Academic Contest duna kini gahin nga budget nga P80 mil, P250 mil sa Supreme Student Government ug Supreme Pupil Government. Sa staff development dunay gigahin nga P700 mil, Alternative Learning System (ALS), P150 mil, MADRASAH, P72 mil ug P642,000 alang sa anniversary celebration sa Talisay City Division, P73 mil alang sa demolisyon sa classroom building sa Talisay National High School,  P100 mil sa honorarium sa LSB members, P180 mil sa consultancy service-legal consultant ug P170 mil alang sa furniture and fixtures sa mga armchair sa San Isidro Elementary School ug Tabunok National High School. (BANAT NEWS)