2 nalubaan ug natigbasan angol

CEBU, Philippines - Pulos angol ang duha ka mga mananagat human kini mag-unay  og  dinunggabay ug tinigbasay  sulod sa diskohan didto sa Sitio Barges, sa isla sa Hilantagaan, lungsod sa Sta Fe, isla sa Bantayan sa miaging  kaadlawon. Ang unang biktima  mao si Jay-R Dobli, 23, ulitawo,nagpuyo ra sa maong  dapit ug usa ka mananagat.

Samtang ang ikaduhang biktima mao si Dino Villabrelle, 20, mananagat  usab   nga silingan sa unang biktima.

Si SPO1 Wainright Desabelle sa Sta. Fe Police Station mibutyag sa Banat News nga samtang  nagpahigayon  og disko  ang  mga  batan-on  sa maong  lugar  nagkaabot  ang  duha  ka  mananagat  nga pulos  maayong laki mosayaw  og  disko.

Apan misangpot  sa  pagsinuyaay  ang matag  grupo  nila hinungdan  nga  giatake  dayon  ni  Villabrelle ang unang biktima nga si Dobli pinaagi  sa pagdunggab sa tiyan ug pusod  niini  sa  duha  ka higayon samtang nagsayaw  kini.

Si Dobli nga wala maintimano nakadagan pa paingon sa gawas sa  diskohan ug mipauli  tungod kay duol ra man  ang ilang  balay sa  diskohan. Unya  mibalik kini nga nagbitbit na og sundang dayon misumbalik atake  batok  ni Villabrelle pinaagi  sa pagtigbas niini sa makadaghan.

Naputos sa samad tinigbasan ang  mga  bukton   ni  Villabrelle nga  maoy  iyang  gipanagang  sa sundang. Lakip  nga  nasamad  mao  ang  iyang liog , walang bahin sa lawas ug dughan, dayon  nahunong  ang  pagpanigbas  kaniya dihang  milihok  ang  mga  nakasaksi  sa pagsanta  kang Dobli. Human sa maong  pagpanigbas  pulos  gisakwat  ang  duha  ug  gihatud  ngadto  sa  Bantayan District Hospital.

Gituohan sa kapolisan nga panagbingkil sa diskohan ang hinungdan sa ilang away ilabina dihang pulos  na  kini  lasbag  sa alak  nga makahubog. (BANAT NEWS)