DSWD mipalig-on sa mga programa alang sa kabus

CEBU, Philippines - Mikapin sa 50 ka mga field staff nga gikan sa mga nag-unang programa sa  Department of Social Welfare and Development (DSWD) nga naglangkob sa Pantawid Pamilya Pilipino Program (4Ps), Kapit Bisig Laban sa Kahirapan, Comprehensive and Integrated Delivery of Social Services (KALAHI-CIDSS) ug ang Sustainable Livelihood Program (SLP)  nagtagbo bahin  sa pagpalambo  pa sa maong  mga  programa.

Sumala  ni  Jaybee Binghay, tigpamaba  sa DSWD7  nga  ang  mahinungdanong estratehiya  nga  makatubag sa kakabos, kagutom, suliran  sa  panglawas ug usab edukasyon sa Millenium Development Goal (MDG) maoy  gituki sa gipahigayong  Regional Roll-out for External Convergence Training (RRECT).

Sumala pa ni  Binghay, nga ang maong RRECT nakahatag  og  dugang  kahayag sa hunahuna sa mga miyembro sa Municipal Action Team (MAT) sa DSWD bahin sa rason nga  nagpaluyo  sa gitawag  nga Social Protection Programs sa maong ahensya.

Dugang pa ni Binghay nga kining maong panagtagbo nakahatag usab og giya sa MAT kalabot sa relasyon niini sa external nga institusyon ug organisasyon sa natad sa paggama ug pagpausbaw sa panagtambayayongay sa tanan.

Ang mga mipaambit sa ilang mga hunahuna naglangkob nila ni DSWD National Consultant,  Dr. Fernando Aldaba, sa University of the Philippines (UP), Socorro Dorin Salas ug Virgie Clapano  sa Department of Interior and Local Government (DILG), Mayor Socrates Fernandez sa syudad sa Talisay, Tessie Fernandez sa Kaabag Sugbo, Dominic Chua sa Ramon Aboitiz Foundation, Inc. (RAFI), Dr. Bibiana Isok sa Cebu Normal University (CNU)  ug Pastor Ramil Jawili sa NACPHIL kinsa maoy mi-highlight sa panagtagbo sa lokal nga lebel sa goberno.

Gibutyag ni Binghay nga human sa maong pagbansay-bansay, ang mga partisipante nakahuna-huna gilayon og tagsa-tagsa nila ka mga lokal nga plano sa syudad ug municipal nga lebel gamit ang Roll-out External Convergence Strategy.  (BANAT NEWS)