Salisi gang nasakpan sa CCTV

CEBU, Philippines - Usa ka Korean national nga staff sa usa ka factory diha sa barangay Alang-alang dakbayan sa Mandaue ang nawagtangan sa iyang Galaxy tab sud sa ilang establisemento nabiktima sa gituohang  sakop sa “Salisi gang.”

 Si An Je Yun, 38, nga taga dakbayan sa Sugbu ug staff   sa Iontex Factory Outlet ang nawagtangan sa iyang Sam sung galaxy tab nga nagkantidad og  P38,000.

Matud pa sa kapolisan ang gwardiya nga si Geovanni Cuesas, security sa maong establisamento, miabot ang suspek adlaw’ng Miyerkules luwan sa usa ka taxi nga adunay body no.5398 nga gipanag-iya sa E.C Taxi .

Ang kawatan gihulagway nga bayoton ang linihukan nga misulod sa ilang establisamento ug nagpakaaron ingnong customer apan dangtan ang pila ka gutlo migawas kini og balik agi sa exit door diin didto gikatahong nagpaabot ang taksi nga iyang gisakyan.

Sumala pa nakig-estorya pa ang kawatan ngadto sa kahera ug nangayo og brochure alang sa uban nilang baligya hinungdan nga mikuha usab og brochure sud sa ilang buhatan ang kahera apan didto nakahigayon ang kawatan sa pagkuha sa Samsung galaxy tab nga gi-charged duol sa iyang lamesa. Ang pagpangawat nakuha sa CCTV camera sa maong tindahan. Sa gihimong follow up sa kapolisan sa garahian sa E.C Taxi wala magtakdo ang body number niini sa nasuwat sa  security guard.  (BANAT NEWS)