Magkapuyo gipamusil angol

CEBU, Philippines - Nangaangol  ang magtiayon  nga  tigpatanto  og  kuwarta human   kini  pamusila sa  wala  hiilhing  kriminal    sulod  sa gipatukod  nilang  balay  didto sa barangay Guinsay, siyudad sa Danao,  niadtong Martes sa alas 2:00 sa hapon.

 Ang mga biktima mao si Leonarda Ypil, 35 anyos, ug  ang  kapuyo  niini  nga  si Ervin Tagalog, 36, nga  nagpuyo sa F. Ralota St.,  Poblacion,  sa maong  dakbayan  sa Danao  kinsa  naila  nga tigpatanto og  kuwarta  sa maong  lugar

Si PO3 Reynaldo Perez  sa Danao City  Police Station mibutyag  sa Banat News nga  ang  nag-inusarang  kriminal  nagtaptap  sa nawong  nga misulod  sa gipatukod  nga  balay  sa  mga  biktima  ug  walay  mga  estorya  gipamusil  dayon  ang  mga  biktima.

Si Ypil naigo  sa ilong  samtang  si Tagalog  naigo  usab  sa kamot.

Matud ni PO3  Perez   nga  ang  mga  biktima  didto  sa maong  lugar  kay  nagsusi  sa gipatrabaho  nilang  boarding  house   dihang  kalit  lang  misulod  ang  kriminal.

Dihang  naigo  ang  duha,  dali usab  kaayong  migawas  ang  kriminal  ug  midagan  pahilayo  sa maong  lugar.

 Ang kapolisan nagduda nga nakaila  ang mga biktima sa kriminal hinungdan  nga gitaptapan  ang  nawong  niini  og panapton.

Sa pagkakaron  padayon  pa nga  giimbistigar  sa kapolisan  ang  maong  hitabo. (BANAT NEWS)