Pagbahin-bahin sa mga scholar gisaway

CEBU, Philippines - Ang  usa  ka  hugpong  sa  mga   opisyal  sa nagkalainlaing tulunghaan  sa  dakbayan   sa  Sugbo  misaway  niining  dili  angay  nga  pag-bahin-bahin  sa  mga  scholar sa kagamhanan  ngadto  sa 19   ka  mga  kolehiyo  ug  unibersidad   nga akriditado niining  maong  programa tungod  kay  gihakop  sa  usa  ka  konsehal  nga  tag-iya  og kolehiyo  ang kinabag-an  sa   scholar.

Sa  suwat  nga  nadawat  sa Banat News  nga gipadangat  sa grupo  nga Cebu Educators Forum (CEF) alang  kang Kalihim  Armin  Luistro  sa Department  of Education  ug  kang  Mayor  Michael Rama  sa dakbayan  sa Sugbo, giyagyag  sa grupo  nga  samtang  ang  18  ka  mga  akriditadong  eskuylahan  alang sa scholarship  program, gigahinan  lang  og  taggatos  ka  mga  scholar,  ang  Asian College  of Technology (ACT)  nga  gipanag-iya  ni  Konsehal Rodrigo Abellanosa maoy  mihakop  sa 5,539  ka  mga  estudyante  nga  labaw  sa katunga   sa gidaghanon  sa  mga  scholar  nga gipisik  ngadto  sa laing  18 ka  akriditadong  tulunghaan

Matag  scholar  gigahinan  sa kagamhanan   og tag P10,000 matag tuig,  apan   ang  mga  estudyante  nga nagpuyo  sa  mga  bukirang  barangay  gihatagan  pa  kini  sa kagamhanan  og  dugang  P1,000  isip  transportation allowance.

Gumikan  niining  giingon  nilang  pamintaha  ni  Konsehal  Abellanosa,  ang CEF  miawhag  kang  Luistro  ug Rama  nga   labing maayo    bahinon    nga patas  sa 19 ka  akriditadong   eskuylahan   ang  tanang  scholar  sa goberno  ug  dili  kay hakpon  ni Abellanosa  ang  mas labing daghan niini alang  sa iyang ACT.

Gawas  niini  giawhag  nila si  Luistro  ug Rama  nga  dili  tugotan  si kinsa  mang  politiko  nga  mangunay  paghangyo  sa  mga  magtutudlo    nga nag-atiman sa  scholar nga  papasahon  ang  hingtungdan  bisan  kun  dili angay.

Sa nasayran  si Konsehal  Abellanosa  kinsa  maoy  chairman  sa committee  on  education  ug  sa  scholarship committee  sa konseho  sa dakbayan   ug  mao  usab  ang  tag-iya  ug  president  sa ACT  , gituohan  sa  mga  sakop  sa CEF  nga  usa  kini  sa hinungdan  nga  nakabintaha  siya  pag-ayo  sa  hinakpanay  sa  mga scholar  sa goberno  ning  dakbayan.

Ang    mga membro  sa CEF  nga  namirma  sa maong  suwat  naglakip  kanila  ni Prof. Phoebe Zoe Maria U. Sanchez  sa UP-Cebu; Dean Delfin Cabañero sa UC Main;Prof. Aurelio Vilbar, Ph. D. sa UP-Cebu; Dean Nerissa Lopez Ph.D sa UV; Dean Filomena T. Dayagan, Ph. D, CNU, ug  Regletto Imbong, ACT.

Sa bahin  ni  Konsehal Abellanosa, sa sayo  pa daan  na  niyang  gipanghimakak  ang maong  pasangil. Gani  matud  pa  niya  nga  ang  mga isyu  nga  ingon  niini  dili  niya  ikahibulong  kay  nasayud  siya  nga  kini  usa ka  pamolitika  sa iyang  mga kaatbang  batok  kaniya. (BANAT NEWS)