Inahan sa Koreanong naghikog ikiha sa GMA7
CEBU, Philippines - Ang GMA 7 Cebu mibahad nga mokiha sa inahan sa Koreanong misuwa’g hikog ug suspek sa pagpatay sa usa ka Cebuana sa dakbayan sa Lapulapu gumikan sa suway nga pag-ilog niini ug pagpapas sa footage nga nakuha sa cameramen sa maong estasyon.
Ang inahan ug mga paryente ni Hyun Chul Whang suspek nga mipatay sa iyang uyab miabot sa Lapulapu human kini masayud sa pagkalambigit sa iyang anak sa maong krimen ug buot unta kini nga magpakamatay.
Sa pag-abot sa inahan ni Hyun sa buhatan sa kapolisan sa dakbayan sa Lapulapu ala 1:30 sa milabay’ng hapon gikuhaan kini og video footage ni GMA 7 Cebu Reporter Vicsmy Jumao-as ug Leofil Labastida, nga cameraman sa GMA 7 Cebu. Apan giingong mihiwasa sa kasuko si Mrs. Hyun ug buot unta nga ilogon ang maong camera.
Sa atubangan ni Lapulapu City Police Office Director P/SSupt. Rey Lyndon Lawas ,si Mrs. Hyun mipasabot nga gusto niining mapapas ang video footage nga nakuha sa GMA 7 Cebu . Apan gipasabot kini ni SSupt. Lawas nga dili angay hilabtan ang trabaho sa taga media. Gumikan niini nakadesider ang GMA 7 Cebu nga mopasaka og kaso batok ni Mrs. Hyun ug sa mga paryente niini .
Samtang si Hyun Chul Whang nagpabilin pa nga anaa sa kritikal nga kondisyon human kini magtinguha nga maghikog unta pinaagi sa pag-inom ug kemikal nga makahilo, ug gusto ni Mrs. Hyun nga ibalhin og laing tambalanan ang iyang anak. Siya maoy gipasanginlang miunay og patay sa iyang uyab nga Filipina nga si Whendy Jean Noel, 22, nga taga Kalawisan, Lapulapu, sulod sa lawak nga giabangan niini sa Brgy. Basak sa maong dakbayan sa miaging adlaw.
Matud pa ni PO2 Luisito Ernie nagduda sila nga gikulata ni Hyun si Noel nga miresulta sa kamatayon niini. Base sa death certificate ni Noel nasuta nga gituok ang liog niini nga maoy nakaingon sa iyang kamatayon.
Sa pagkakaron higpit nga gibantayan sa kapolisan si Whang nga anaa sa tambalanan. (BANAT NEWS)
- Latest
