P1.2 milyon ang danyos sa sunog sa Argao

CEBU, Philippines - Gibanabanang mo-abot sa P1.2 milyones  ang kinatibuk-ang danyos sa pagkasunog sa duha ka andana nga commercial building didto sa barangay Poblacion sa lungsod sa Argao kagahapon sa alas 2:15 sa kaadlawon.

Ang nasunog nga 2-storey commercial building mao ang Jolly Metro Plaza usa kini ka tindahan nga gipanag-iya sa negosyante nga si Richard Lee, molupyo dinhi sa dakbayan sa Sugbo.

Matud ni SFO2 Kevin Rodriquez, fire investigator sa kabomberohan sa lungsod sa Argao na-kontrolar paglabay sa 30- minutos ang kalayo.

Nasuta sa imbestigasyon nga nagsugod ang kalayo sa groundfloor nga bahin sa tindahan nga daling nikaylap sa tibuok establisemento apan wala hinoon makatabok sa kasikbit nga mga panimalay.

Ang mga stay-in worker nga sila si Amor Patagaytay, Ancita Eballar mga saleslady, boy nga si Claudio Flores ingon si Rosita Baron ug ang gwardya nga si Grace Cabico daling nakagawas sa establisemento dihang niulbo na ang kayo. (BANAT NEWS)