Gullas way utang sa VSMMC

CEBU, Philippines - Si Kongresista Eduardo Gullas sa unang distrito sa probinsiya sa Sugbo miklaro nga ang Gullas Medical Assistance Program (GMAP) wala kini outstanding balance o utang sa Vicente Sotto Memorial Medical Center (VSMMC).

Ang maong pamahayag ni Gullas mitumaw human sa report nga ang VSMMC giingong dili modawat sa mga pasyente gikan sa probisiya tungod kay mikabat na ngadto sa P900,000 ang utang sa GMAP.

Ang maong proyekto gisugdan kini kaniadto sa manghud ni Gullas nga si kanhi Kongresista Jose “Dodong” Gullas ug tie up kini sa VSMMC sukad pa niadtong 2001.

Tumong sa proyekto nga mahatagan og libreng hospitalization ang mga kabus nga residente ubos sa distrito ni Gullas.

Matud sa Kongresista nga niadtong milabay’ng tuig mihatag siya og advance nga bayad nga P3 milyones ug ang maong pundo wala pa kini mahurot og gamit.

Ubos sa programa nga ang matag kabus nga pasyente nga gikan sa unang distrito makapahimulos kini og P5,000 nga pinansiyal nga hinabang.

Gibutyag ni Gullas nga kanunay siyang molagda og memorandum of agreement tali sa VSMMC aron matugotan ang mga residente sa iyang distrito nga makakuha og medical care.

Si Gullas mihatag og P5 milyones nga counterpart alang sa proyekto nga gikan sa iyang priority development and assistance fund (PDAF).

Gikataho nga ang VSMMC giingong mihunong og pagpanawat og pasyente gikan sa probinsiya tungod sa mokabat nga P1 milyon niining utang.

Hinuon ang kapitolyo daling mihatag og partial nga bayad sa maong utang aron ang mga pasyente ma-admit kini sa tambalanan. (BANAT NEWS)