Majong ug tigbakay ipalegalisar ni Mañalac

CEBU, Philippines - Gitinguha ni Ret. Regional State Prosecutor Vicente Mañalac ang paglegalisar sa sugal nga majong ug tigbakay.

Matud ni Fiscal Mañalac atol sa interview sa Bantay Radyo   nga hingusgan niya ang pag- ligalisar sa sugal nga majong ug tigbakay aron patas ang tanan pobre ug datu, adunay higayon sa paglingaw- lingaw ilabi na sa mga adlaw’ng Sabado ug Domingo nga dili tingtrabaho.

Matud ni Mañalac nga  sa  pagkakaron luoy kaayo tan-awon  kay dili patas  ang balaod  ilabina ang mga  kabus nga kanunay  lang  hulga-on   nga  dakpon  sa ilang pagtago -tago   sa pagsugal og  majong ingon man tigbakay matag Domingo.

Midugang  siya  nga alkanse   ang  mga kabus kun itandi sa mga kuwartahan    kay  makahimo  man  sa pagpanugal  bisan  unsang  orasa  kay anaa  may  casino  nga  kapanugalan  nila.

Dugang  pa  ni Mañalac nga pinaagi unya sa iyang  balaodnon  umolon , gusto  niyang  patas  ang  tanan kay  isipon  niya  nga  ang  majong   usa  ka matang  sa sugal  nga angay  tawgon  nga  game of skills kay usa man kini ka parlor game ug dili sugal subay sa opinion gikan sa Department of Justice (DOJ).

Laing  balaodnon   nga giplano  ni Mañalac mao  ang pagbukas og   free College Education sa mga mo-graduwar sa high school. Matud niya nga  sayon ra kining himoon pinaagi sa pagpasar ug balaodnon nga mag -obligor usab sa mga dagkung kompaniya dinhi sa nasud nga mo-amot og 1 percent sa ilang net income matag  tuig alang sa free college education sa mga tinun-an ug  mao  kini  usa  sa  mga butang  nga  iyang tutokan  sa  north district.

Bugti niini ang pagtibhang sa bayranang buhis sa maong mga kompaniya   sa Bureau of Internal Revenue  (BIR).

Laing plano ni Fiscal Mañalac  mao  ang pagbaton sa  hingpit og kaugalingong luna  nga kapuy-an sa tanang mga urban poor sa  dakbayan ilabina sa  taga  North District, aron pagsulbad sa problema sa  demolisyon sa mga  urban poor dinhi sa dakbayan.

Misaad  siya  nga  inigbukas  na  sa  campaign period karong sunod buwan mag- house to house   na  siya  sa  tanang mga lugar sa north district aron ma- kighimamat sa mga botante sa maong  lugar human  siya  mosang-at sa  iyang  certificate of candidacy  alang  sa umaabot  nga  piniliay.  (BANAT NEWS)