Nahimong damage sa natagak nga trak sa Marcelo Fernan Bridge dul-an P1M

CEBU, Philippines - Mokabat sa P774 mil ang danyos sa Marcelo Fernan Bridge nga mugna sa usa ka dump truck nga nahagbong niadtong Martes sa gabii. Kini ang gibutyag ni acting Gob. Agnes Magpale kinsa mao usab ang kasamtangang pangulo sa Mactan Cebu Bridge Mangement Board. Si Magpale nimando sa pakisusi sa kinatibuk-ang danyos aron makahimo og aksiyon ang MCBMB.

Matud pa ni Magpale nga ang tag-iya sa trak nga si barangay kapitan Remegio Oyao sa Agus, dakbayan sa Lapu-Lapu ang ilang pabayron sa danyos. Gikatakda nga ayuhon sa Department of Public Works and Highways (DPWH) ang naguba karong adlawa, sumala pa ni Magpale. Ang trak nga nagkarga og anapog ang nahagbong sa habig sa dakbayan sa Mandaue hinungdan sa pagkaguba sa ali sa taytayan samtang kini padulong sa dakbayan sa Lapu-lapu.

Ang trak nga may plaka, ZDS-410, puno sa anapog gikan sa barangay Talamban sa dakayan sa Sugbo ug paingon na unta kini sa dakbayan sa Lapu-lapu dihang naaksidenti.

Matud pa nga ang drayber nga si Fidel Lopez taga Barangay Looc, dakbayan sa Lapu-lapu nawagtangan og kontrol sa pagmaneho sa dihang nabuak ang bearing sa manobela.

Nahagbong ang trak atubangan sa Mandaue City 's Livelihood Center.  (BANAT NEWS)