Hubo nga manag-uyab

CEBU, Philippines - Hubo nga patay’ng lawas sa  babayeng Pilipina ug hubo usab nga  Korean national ang nadiskubrehan nga nagbuy-od sa kama sa sulod sa lawak sa San Francisco Hotel sa sitio Ibabao, barangay Basak, dakbayan sa Lapulapu.

Ang patay na nga nadiskubrehan mao si Wenby Jean dela Cruz Noel, 22, dalaga nga taga sitio Kinalumsan sa barangay Gun-ob sa dakbayan sa Lapulapu.

Samtang gitabang pa sa tambalanan ang Korean national giila usab sa kapolisan nga mao si Hyun Chul Hwang, 29, kasamtangan nga nagpuyo sa Pacific Villa nga nahimutang sa barangay Pusok, dakbayan sa Lapulapu.

Si SPO1 Allan Pantaleon sa Homicide Section sa kapolisan sa maong dakbayan nga nahinabi sa Banat News miingon nga base sa gitug-an kanila sa tagdumala sa maong hotel,  ang duha ilang gituohan nga manag-uyab. Sumala pa nga mi-check in ang duha alas-10 pasado ang takna sa gabii niadtong  Pebrero 8 niining tuiga.

Si Edgar Tantay nga usa sa mga personnel sa maong hotel nga ilang gisukit-sukit miasoy nga gituktok niini ang pultahan sa lawak sa duha aron unta manglimpyo.

Apan bisan gi-unsa niya kini pagtuktok way migawas gikan sa lawak maong gipahibalo niya kini sa ilang hotel manager nga si Elizabeth Pales kinsa dali usab nga mitawag sa kapolisan.

Sila si SPO4 Remegio Ngujo ug mga kauban maoy mi-abli sa pultahan sa lawak  ug maoy ilang nakit-an ang walay sapot nga dalaga ug ang Koreano ibabaw sa kama.

 Matud pa ni SPO1 Pantaleon pagsusi sa mga polis buhi pa ang langyaw hinungdan nga ilaha kining gidala sa Mactan Doctors Hospital apan ang babaye wala nay kinabuhi.

Midugang si Pantaleon nga ang lawas sa dalaga naputos og mga bun-og  hinungdan nga nagduda silang mao kini iyang gikamatyan.

 Ang Korean national mao karoy gidudahan nga suspek sa kamatayon sa dalaga kinsa gidudahang misuway paghikog pinaagi sa pag-inom og kemikal apan naatlan nga sayong nadiskubrehan ug nadala pa sa tambalanan. (BANAT NEWS)