Desisyon sa Comelec pabor ni Lagon sa Tuburan

CEBU, Philippines - Gihukman  sa Commission  on  Elections (COMELEC) nga kwalipikadong  mokandidato  sa pagka-bise  mayor  si Daphine A. Lagon  sa lungsod  sa Tuburan , Cebu  sa piniliay  karong  Mayo 13, 2013.

Kini  human   ibasura  sa  Second Division  sa Comelec  ang  petisyon  nga  gipasaka  batok kang Lagon  nga   miakusar  kaniya  nga  dili  kuno  siya botante  sa lungsod  sa Tuburan.

Sa gisuwat  nga decision  ni Ma. Josefina E. dela Cruz, Clerk sa Commission   nga  gipetsahan  og Enero 28, 2013, gipatin-aw  niini  nga  walay  merito  ang  pasangil batok  kang Lagon.

Kini  tungod  kay base  sa record, nasuta  sa Comelec  nga nagtug-an  sa tinuod  ang  hingtungdan  sa  iyang  sertipiko de kandidatora  ug  wala  kini  magtumotumo sukwahi  sa akusasyon  nga  gipasaka  sa mipetisyon  kaniya nga  kaatbang  niya  sa politika.

Ang  maong  hukom sa Comelec  maoy nagsalindot  ug  nagsalikway  sa petisyon    batok  kang Lagon  gumikan  sa kapakyas  sa iyang  mga   kaatbang  sa   pagpamatuod  nga  ang  ilang  gipetisyonan  nga  si Lagon  dili  tinuod  nga  botante  sa maong  lungsod.

Subay  sa pamahayag  ni  Lagon  agi  og  tubag  sa petisyon  nga  gisang-at  batok kaniya,  nga  nakaparehistro  siya  pinaagi  sa “biometrics” niadtong  Decembre 7, 2003 isip botante  sa precinto  0016A sa barangay  Poblacion 5, sa Tuburan , Cebu.

Hinuon  giangkon  ni  Lagon  nga  tungod  kay  wala  sila  makabotar makaduha  ka higayon, na-“deactivate” o nawad-an  og  epekto  ang  iyang  rehistro.

Apan  iyang  gisaysay  sa Comelec  nga  mi-apply  siya  og “deactivation”  sa iyang  rehistro  niadtong Oktobre 10, 2012  nga  nasulod pa  sa tagal  nga ubos  sa gimbut-an  sa balaod.

Namahayag  usab  si Lagon  nga  sa sayo  pa  sa iyang pakigpulong  atubangan  sa katawhan  sa Tuburan    iyang  gipanghimaraot  ang  pagpanghasi  kaniya  sa  mga kaatbang  niya  sa politika.

Iyang  gisaad  sa  mga  Tuburanon  nga  bisan  bag-o  pa  ang iyang dagway   sa natad  sa politika apan   anaa  siya  kanunay  nagpaluyo  sa mga kaakohan  alang  sa  mga  Tuburanon  nga  mao  ang  paghatag  og  dugang  kauswagan  sa maong  lungsod.

Karong  nahukman  na  sa Comelec  nga  kwalipikado  si Lagon  nga  mokandidato  sa  pagka-bise mayor  ni kanhi mayor Rose Gerona Suezo  ubos  sa UNA-One  Cebu  party,  sa Tuburan  wala  na  siya’y  gikabalak-an , matud  pa  ni  Lagon. (BANAT NEWS)