Duha gikawata’g motor

CEBU, Philippines - Duha ka mga lalaki usa niini drayber sa City Agriculture sa Talisay nakawatan sa ilang mga motorsiklo niadtong Huwebes. Unang insidente nahitabo diha sulod sa city hall compound sa siyudad sa  barangay Mohon.

Ang biktima mao si Marcelino Alcontin, 37, drayber sa City Agriculture Office, residente sa barangay Mohon.

Sa imbestigasyon sa mga polis nga ang Sunriser nga motorsiklo ni Alcontin nga nagtangag sa plakang 1658-XY kolor itom giparada niini diha kilid sa power house sa likod nga bahin sa city compound.

Apan mga alas 4:00 sa hapon nabantayan na lang sa biktima nga wala na diha ang iyang motorsiklo sa nahimutangan niini.

Ang sunod nga insidente nahitabo mga alas 8:00 sa gabii sa nahisgutang adlaw diha sa barangay San Roque.

Ang biktima giila nga si Napoleon Mañacap, 42, residente sa maong dapit.

Si Mañacap kinsa gikan sa trabaho miparada sa iyang Honda XRM nga motorsiklo nga nagtangag sa plakang 7TC-H-5448 diha atubangan sa ilang balay. Apan nakugang na lang ang biktima dihang nadiskubrehan niining nahanaw na ang iyang motorsiklo sa nahimutangan niini.  (BANAT NEWS)