Apprentice miambak sa barko na-missing

CEBU, Philippines - Pabiling missing ug gikabalak-ang patay na ang apprentice marine engineer nga niambak sa pantalan aron unta pagkuha sa iyang pitaka nga natagak sa dagat samtang nakabaradero ang ilang barko didto sa pantalan sa Sandoval Shipyard barangay Tayud sa lungsod sa Liloan niadtong Huwebes sa alas 7:30 sa gabii.

Ang biktima mao si Ariel Montebon, 22, taga Estancia, Iloilo  nga usa ka apprentice marine engineer sa M/V Lady of Prosperity.

Matud ni PO2 Johnaskie Romero sa Consolacion Police Station dihang nahinabi sa Banat News nagpahayahay sa ibabaw nga bahin sa barko si Montebon dihang aksidenteng nahulog ang pitaka niini sa dagat.

Matud pa giusikan kini sa sulod sa pitaka nga gituohang posibleng naglakip sa mga importanteng identification cards ug papeles gawas sa salapi.

Daling miambak sa dagat si Montebon aron apason ang nitidlom niyang pitaka apan dangtan na lang og pipila ka minutos ug oras wa na kini molutaw og balik hinungdan nga nagpatabang na ang iyang mga kauban sa kapolisan.

Gawas sa kapulisan nitabang sa search and rescue operation ang mga sakop sa Navy divers ug mga sibilyan apan hangtud ning pagsulat sa balita wala pa gyud igkita ang maong apprentice mate.

Gituohan nga napakong ang ulo niini sa iyang pag-ambak ug gianod sa sulog.  (BANAT NEWS)