Maestrang dagmalan priso og unom ka tuig
BACOLOD CITY, Philippines — Usa ka maestra ang gi-sentensyahang mapriso og unom ka tuig human mapamatud-ing guilty sa child abuse nga kasong gipasaka batok kaniya tungod sa pagdagmal ngadto sa iyang tinun-an walo na ka tuig ang nakalabay.
Ang maong maestra sa Mathematics gisilotan usab og unom ka bulang pagka-suspenso tungod sa kasong administratiba tungod sa nahimong “grave misconduct†nga gipasaka sa ginikanan sa bata. Ang pangalan sa maong maestra ug sa eskuylahan gipugngan tungod kay ang nalambigit usa ka bata nga nag-edad kaniadto og 9-anyos.
Matud pa sa reklamo sa bata nga niadtong Pebrero 17, 2005 gimandoan nga dili una papaulion kay pakuhaon sila og remedial class sa Math alang sa umaabot nga Regional Achievement Examination.
Matud pa dunay gipa-sulbad nga Math problem ang magtutudlo diha sa board maong mitungtong siya og bangko, apan tungod kay sayop ang iyang tubag nasuko ang magtutudlo ug gibunlot ang buhok sa biktima ug gilamba ang ulo niini sa blackboard.
Human niini, matud pa sa bata gisipa sa maestra ang iyang bagtak maong natagak siya sa bangko.
Ang bata nabukol sa agtang ug naghilak nga naabot sa ilang balay ug misumbong sa gibuhat kaniya sa maestra.
Apan ang maestra mihimakak niini ug nangangkon nga igo ra niyang gibanghagan ang bata ug nahagbong ra kini og iya sa bangko.
Apan sa gipagawas nga desisyon ni Bacolod Regional Trial Court Branch 41 Judge Ray Alan Drilon mas mituo sa testimonya sa bata ug sa mga ebidensyang gi-presentar sa prosekusyon.
Matud pa dili makabaton og ingon niadto nga bun-og ang bata kung sa pagkahagbong lang sa bangko. Wala usab mag usab-usab ang statement sa bata maong nakombinsir ang korte nga wala magtumotumo ang bata. (/EIM) (BANAT NEWS)
- Latest
