NSO mo-survey sa mag-uuma ug mananagat

 CEBU, Philippines - Mikabat  sa 2,000  kapin ka  mga  enumerator kon surveyor    ang  gipatrabaho  karon  sa kagamhanan  aron  sa pagpanglista sulod ning  buwan  sa Pebrero   sa gidaghanon  sa  mga mag-uuma  ug  mananagat  ug  ang  matang  sa ilang kahimanan  ug  produksyon   sa tibuok  Central  Visayas.

Kini ang gibutyag  ni Regional Director Ariel E. Florendo  sa National Statistics Office (NSO)7 atol  sa AGIO Forum  nga  gipahigayon  sa ilang  buhatan  ug  gipalanog  usab  sa DYMR  Radyo  ng  Bayan sa Cebu sa miaging  adlaw.

Matud  pa ni Florendo  nga  ang  buhaton  sa maong  mga  enumerator  mao  ang  pagtala  sa gidaghanon  sa mga  mag-uuma  ug  mananagat  sa matag  barangay  ug  ang  matang  sa ilang  mga  produkto  sa kaumahan  ug  sa kadagatan  ug  ang  mga  kahimanan  nga ilang  gigamit  sa  ilang  panguma  ug  sa ilang  mga panagat.

Ang tumong  sa kagamhanan  niini  sumala  ni Florendo  mao  nga  aron   kahatagan  og  igong  impormasyon  ang  mga  negosyante sa matang  sa  produksyon  sa agrikultura   nga  gusto  nilang  buboan  og  puhonan  alang  sa ilang negosyo.

Sa samang higayon  matun-an  usab  sa kagamhanan   kun  unsay  labing  gikinahanglan  sa mga  mag-uuma  ug  mananagat aron kahatagan  sila  og  hinabang  sa nasudnong kagamhanan aron sila mo-asenso  sa ilang  panginabuhi.

Tungod  ning  maong  gimbuhaton, si Provincial Statistics Officer Firmo C. Deputado  sa lalawigan  sa Sugbo nagkanayon  nga  nakig-alayon  ang  NSO7  karon sa  mga  opisyal  sa matag  barangay  aron katabangan  nila ang  matag  enumerator  nga  motungha  sa ilang lugar  aron  mo-survey  ug manginterview  sa  mga  mag-uuma  ug mananagat .

Kini   sa tuyo  nga  dili ibaliwala  sa  mga  tagbalay  ang  mga surveyor  nga  motungha sa ilang  balay  aron  mangutana  kanila  bahin  sa ilang  panginabuhi.

Matud  pa  ni Deputado  nga kining  maong  survey  gilusad    sa kagamhanan sa tibuok  nasud  aron magsilbi  nga giya  sa  mga  programa  nga  mahimong iimplementar  sa goberno  aron katabangan  ang  mga  mag-uuma  ug  mananagat  sa nasud ug  aron  nga labing  mouswag  ang  produksyon  sa agrikultura  dinhi.

May  labot  kini  matud  pa  niya  sa paningkamot  sa kagamhanan  nga  dili  na  kita  mosalig  pa  sa ubang  produkto  sa laing  nasud  alang  sa atong  kaugalingong  konsumo  kundi  ang  tanan  maggikan  ra usab sa atong  kaugalingong  rekurso  ug  sa atong  mga tig-tikad  sa yuta  ug  kadagatan. (/WC)  (BANAT NEWS)