Tinun-an maka-graduate

CEBU, Philippines - Giklaro sa kadagkuan sa tunghaan sa University of San Jose Recoletos nga maka-gradwar ang ilang tinun-an nga nalambigit sa “sex scandal” kung maka-comply kini sa mga gi-kinahanglang rekisitos sa iyang kurso.

Gani, matud pa sa USJ-R President nga si Rev. Fr. Enrico Peter Silab, sa opisyal nga statement sa tunghaan kagahapon ilang tabangan ang maong estudyante nga makahuman sa iyang kurso karong Marso.

“Measures to ensure that she would finish her course with the minimum amount of exposure, so as to protect her privacy, were immediately put in place. An arrangement where she, as a graduating student, would be able to report to her professors outside of class for her lessons was then reached. She was allowed to continue her internship,” matud pang Silab.

Dugang pa ni Silab nga naka-skedyul na ang thesis defense sa maong tinun-an ug madayon kini sa maong petsa nga gi-set sa professor sa maong estudyante.

“Wala ta’y words nga gibuhian ngadto niya nga paundangon na nato siya og eskwela,” dugang pa ni Silab, base sa opisyal nga statement sa USJ-R.

Gihulagway ni Silab nga reactive measure lang siguro sa tinun-an ang pagsampit sa tabang kang Atty. Inocencio Dela Cerna apan sa pagkatinuod wala nila putla ang komunikasyon sa tinun-an sukad nigawas ang maong kontrobersiya.

Tinud-anay, matud pa sa presidente sa USJ-R nga nagpahigayon sila og administrative investigation para masuta kung duna ba’y mga polisiya sa tunghaan nga nasupak ang maong tinun-an.

“But, when the video became viral and reached the media, the investigation was overshadowed by the controversy and the student’s physical and psychological well-being became our main priority,” dugang pa ni Silab.

Nagtuo usab sila nga tungod kay nakuha ang maong video duha ka tuig na ang nakalabay, duna nay kausaban sa maong tinun-an.

Si Silab nagkanayon nga dunay mas dakong peligro nga giatubang ang USJ-R karon ug mao kini ang pagpang-harass, pagpang-bully ug pagbiay-biay ngadto sa mga Josenians diha sa internet ug sa personal.

Gani, ang maong mga negatibong pagsaway nasinati na karon sa mga tinun-an, faculty, personnel ug alumni sa maong tunghaan. Mao kini ang rason nga gisuspenso sa management ang pagpasuot sa ilang uniporme, apan karong Lunes ipasul-ob nila kini pagbalik.

Bisan pa man sa nahitabo, walay planong usbon ang ilang uniporme tungod kay ‘proud’ sila sa ilang tunghaan. Ang mga tinun-an nga nagtan-aw sa wide screen diha sa lobby sa USJR mihugyaw og pakpak pagkadungog sa maong pahibalo kagahapon.

“The school is ready, willing and able to provide legal assistance through lawyers from our prestigious School of Law and counselors from our very capable Department of Psychology to any Josenian who brings forth a complaint,” dugang pa ni Silab.

Gikondenar usab sa maong tunghaan ang tawo nga nag-upload, nag-share, ug si bisan kinsa pa nga nagbugal-bugal og komento sa maong sex video.

Mensahe usab sa kadagkuan sa maong tunghaan ngadto sa ilang mga estudyante ug kaubanan nga ang maong hitabo wala mag-reflect kung unsa ang USJR.

“To be a Josenian is to inspire... And in time of crisis, living lives that inspire become even more important,” matud pang Silab, isip pagtapos sa opisyal statement sa USJ-R.

Samtang si Atty. Jonathan Capanas, ang Dean sa School of Law sa USJ-R, nagkanayon nga “very good” ang academic performance sa maong tinun-an apan wala pa nila matino kung mag-Cum-Laude ba kini.  (BANAT NEWS)