Red Ribbon Campaign vs anti-life ilusad

CEBU, Philippines - Gikatakdang ilusad sa mga pro-life advocates sa Sugbo ang "Red Ribbon" campaign karong umaabot nga adlaw’ng Domingo atol sa usa ka Santos nga Misa diha sa  Cebu Metropolitan Cathedral uban ni Cebu Archbishop Emeritus Ricardo Cardinal.

"We are sending a clear message to the people that the fight against any anti-life bills or laws are not over yet," matud pa ni Dr. Rene Josef Bullecer, ang country director sa Human Life International-Philippines.

Ang mga sakop sa pro-life advocates mipagawas og pamahayag ug mipatawag og press conference dungan sa pag-selebrar sa Archdiocese of Cebu sa bulan sa Pebrero nga Pro-life Month.

Usa ka suwat ang gipadala ni Cebu Archbishop Jose Palma sa kaparian ug mga relihiyosong pundok ug organisasyon nga gamiton ang kasaulogan karon aron mapahimug-atan ang ka-sagrado ug dignidad sa kinabuhi isip usa ka gasa gikan sa Kahitas-an.

Matud pa niini nga ang mga nanggawas nga mga anti-life issues karon maoy nahimong hulga sa maong gasa.

Ang Red Ribbon campaign ilusad sa tanang mga parokya ug ang tanang mga sakop sa Council of Laity and Catholic Charismatic Communities of Cebu gipaabot nga motambong sa maong Santos nga Misa diin ipanghatag ang mga red ribbons.

Giawhag sa Simbahan ang tanang parokya sa Sugbo nga agnihon ang mga manimbahay sa pagsuot og puwa nga ribbon sa tibuok bulan sa Pebrero ug pagbutang og puwa nga ribbon, o banner sa ilang mga balay ug sakyanan. (/EIM) (BANAT NEWS)