Mitago sa Barili tourist bus ikiha sa mayor

CEBU, Philippines - Nagtinguha si Barili Mayor Teresito Mariñas sa pagpasaka og kiha batok sa duha niya ka barangay kapitan kinsa giingong nitago sa ilang tourist bus nga hinatag gikan sa Kapitolyo.

Ang pasakaan og kiha mao sila si Norman Anore sa barangay Mantalongon ug Nelson Gingoyon sa Guibuwangan diin nahimutang ang pribadong bodega sa Pragmatic Development and Construction Corp. nga giingong gitagoan sa tourist bus nga wala na ang ubang bahin niini.

Sa interbyu sa Bantay Radyo kagahapon, si Mariñas miingon nga nanghipos pa sila karon sa mga ebidensiya aron mapasaka ang tukmang kaso ngadto sa korte ug sa Ombudsman.

“Gisabotahe gyud kay may recall order man,” matud pang Mariñas.

Si acting Gob. Agnes Magpale ang nimando sa pagpabawi sa sakyanan human gikataho nga kini gihimulbolan sa mga bahin niini sama sa ligid.

Ang suspendidong gobernador nga si Gwendolyn Garcia ang nihatag sa maong sakyanan sa niaging tuig ngadto sa Association of Barangay Councils nga gipangulohan ni Anore.

Si Mariñas kaalyado ni Magpale sa Liberal Party samtang si Anore kaalyado ni Bise Mayor Marlon Garcia, igsoon ni Gob. Garcia, sa One Cebu Party.

“Sila mao’y angay ikiha kay private property man to ila gisulod, they don’t have any search warrant, ngano pataka man sila og sulod unya mokuha og property didto?” matud pang Marlon. Matud pa ni Marlon nga bisan ang tag-iya sa sakyanan ang probinsiya sa Sugbo apan gitugyan kini ngadto sa ABC pinaagi sa usa ka memorandum of agreement.

Si Eva Encabo, ang hepe sa Provincial General Services Office, kuyog sa hepe sa kapolisan sa Barili nga si Insp. Arvi Arbuis ug kawani sa buhatan ni Mariñas ang niadto sa lugar diin giingong gitagoan ang sakyanan dayun gidala kini ngadto sa munisipyo.

Si Anore giingong sa sayo nipahibawo kang Encabo nga magtigum una  ang ABC Board aron ipahibawo ang kamandoan ni Magpale.

Matud pa ni Marlon nga gikwestiyon ni Anore ang kamandoan sanglit wala may kalapasan nga nahimo sa kasabutan. Nunot niini giawhag ni Marlon ang ABC sa pagpasaka og kaso batok ni Magpale, Encabo, ug uban pang nalambigit sa pagbawi sa sakyanan.

Matud pa ni Marlon nga ang kahambugera ni Magpale nagpakita kini og dili maayong sumbanan sa ilang mga lider sa lungsod nga nihimo usab og mga pagpangabuso. Gidugang ni Marlon nga ang katawhan na lang unya ang maghukom sa umaabot eleksiyon karong Mayo. (/EIM) (BANAT NEWS)