Igsuon sa brgy. kap gipusil patay

CEBU, Philippines - Patay ang igsuon sa barangay kapitan sa barangay Poblacion Pardo sa siyudad sa Sugbo diha mismo sa gimaneho niining traysikol pasado alas-8 sa miaging gabii diha sa may sitio Laray barangay Inayawan sa dakbayan sa Sugbo.

 Ang biktima nailhan nga si Antonio Dasmariñas, molupyo sa sitio Tabukanal sa maong barangay. Si Antonio igsuon ni Barangay Kapitan sa Poblacion Pardo nga si Fermin Dasmariñas.

Sa pakighinabi sa Banat News ni SPO1 Ruth Violanggo sa Homicide Section kini mibutyag nga posibleng gisundan ang biktima ug gipusil gikan sa luyo.

Ang biktima naigo sa likod nga bahin sa iyang ulo ug sa walang bahin sa iyang tampihak.

Apan mitumaw sa imbestigasyon nga dunay nakaaway ang biktima nga giilang sila si Darwin Anga, 36, taga Lower Torre ug Juvan Presbitero, 33, taga  sitio Isla Verde sa maong barangay ug ilaha kini karong gisusi kung may kalambigitan ang duha sa maong pagpatay.

Si Kapitan Fermin Dasmariñas miingon nga wala silay nahibaw-ang kaaway ang ilang igsuon apan iyang nasayran sa  miaging adlaw dunay gikalalis ang iyang igsuon diha sa parkingan tungod lang sa pasahero.

“Sus, ngano gyud kayha, tungod lang intawon sa pasahero iya nang gipatay akong igsuon. Maayo gud nang tawo,” padayag pa sa kapitan.

Samtang si Anga nga gikahinabi sa mga tigbalita sa miaging gabii, mihimakak sa pasangil nga siya maoy nagpusil apan iyang giangkon nga nagkalalis gyud sila sa biktima.

Usa usab ka gang member nga menor de edad ang gipangita usab sa kapolisan tungod usab kay gikalalis usab kini sa biktima sa nangaging mga adlaw. (/EIM) (BANAT NEWS)