Daan ug Natuel miawhag sa publiko

CEBU, Philippines - Taliwa sa daling pagkuyanap sa sex video sa usa ka tinun-an sa inilang unibersidad sa siyudad sa Sugbo, si Acting Governor  Julian Daan miawhag sa mga Sugboanon nga hunongon na ang pagpasa-pasa sa nahisgutang  sex scandal.

Kini tungod kay matud  pa  ni  Daan nga naluoy kaayo siya sa usa ka tinun-an nga  nalambigit sa nahisgutang sex scandal nga giingong  usa ka graduating student.

Nagkanayon  si Daan nga  dili kalikayan  ang  hilabihang kaugtas  sa kinabuhi  ug  sa  pagpuyo  sa maong tinun-an  nga  hingtungdan  ug  lakip  ang  mga ginikanan,  kaigsoonan  niini  ug kaliwatan.

Subay sa iyang panawagan, si Daan niawhag usab ngadto sa iyang kaubang mga sakop sa hunta probinsiyal ug mga opisyal  sa lokal nga  kagamhanan sa paghimo  og lakang   aron kapugngan ang pagpakuyanap sa nahisgutang  sex video.

Siya nanghinaut nga dili na unta subling mahitabo ang maong eskandalo kay makaapektar kini sa mga tawong hingtungdan. Susama  gihapon  niini  ang  awhag  sa kapolisan  sa  dakbayan  sa Sugbo  ilabi  na  niadtong  namaligya  sa  DVD  sa  maong  sex video.

Matud  pa  ni Sr. Supt. Manuel Natuel, ang OIC chief  sa Cebu City  Police Office (CCPO)  nga  gimandoan  na  niya  ang  iyang  mga  sakop  sa pagsakmit sa  mga baligyang tape  o DVD  sa maong  sex scandal.

Sa samang  higayon  giawhag  usab  niya  nga mas  labing maayo  nga  ipaubos sa counseling  and  guidance  ang  hingtungdang estudyante  nga  nalambigit  sa maong  eskandalo aron maulian  ang  kaugalingon  niini  sa hilabihang  kauwaw  ug  kaugtas  nga  iyang  gibati.

Nasayran  nga ang  hingtungdang  estudyante  nagsul-ob  pa  og uniporme  sa inila  nga  unibersidad  nga  iyang  gitunghaan  uban  ang student  identification card niini  atol  sa eskandalo  nga  gihimo  niini. Miingon  si Natuel  nga lisud  na  gyud  hinuon  hisakpan  ang tawo  nga  mi-upload  sa  maong  eskandalo  ngadto  sa internet  apan  ang iyang  hangyo  sa publiko  nga  dili  na  kini  angay  pang  himoong sumsoman  sa pagbugal-bugal.

Labaw  sa tanan  iyang  giawhag  ang  tanan  ilabi  na  ang  mga  mamaligyaay  og  mga  salida  sa DVD  nga  ipa-delete  na  ang  maong salida. (BANAT NEWS)