Dalagita nakaila sa migaid kaniya

CEBU, Philippines - Miluwat na niadtong Lunes sa buntag og affidavit ang 13-anyos nga dalagita batok sa lalaking miguroy ug migaid kaniya sa punoan sa Minchanitas niadtong milabay’ng semana diha sa barangay Lagtang, dakbayan sa Talisay.

Sa imbestigasyon nga gihimo ni PO2 Violeta Godinez ang dalagita mitug-an nga dihang paingon siyang motubag sa sugo sa iyang lawas nasugatan niya ang suspetsado.

Ang suspetsado giingong nagpasumangil kini og pangutana sa bata kung nakaila ba siya sa usa ka tawo. Apan ang bata namalibad.

Ang dalagita mipasangil nga kalit lang siyang gibunlot sa suspetsado ug gigisi ang iyang sapot.

Ang gisi nga sapot sa bata giingong gisumpay-sumpay sa suspetsado unya gihigot sa liog sa bata unya gisampongan sa suspetsado sa iyang kamot ang baba sa bata aron dili kini makasinggit.

Matud usab sa bata nga gigaid siya sa suspetsado sa punoan sa Minchanitas diha sa duol sa ilang nahimutangan.

Human og gaid sa dalagita giingong gibitad sa suspetsado ang sayal sa biktima ug misikil ang pitaka niini nga dunay sulod nga P140 nga kwarta.

Ang dalagita mipasangil usab nga gikuha sa suspetsado ang iyang pitaka ug maayo na lang gani nga naatlan nga naagi ang iyang ig-agaw diha sa lugar hinungdan nga ang suspetsado midagan sa ubos nga bahin  nga lugar.

Sa kalisang sa dalagita mihilak kini ug nangayo og tabang sa iyang ig-agaw. Ang ig-agaw sa biktima mao nay nagpahibawo sa mga ginikanan sa bata.

Si Godinez nagkanayon kini nga misibat na ang suspetsado kinsa taga Talisay usab human sa maong hitabo.

Midugang si Godinez nga nakadawat sila og report nga ang suspetsado giingong mipuyo kini kaniadto ngadto sa probinsiya sa Bohol apan milayas kini gikan sa Bohol.

Hinuon mopahigayon pa sila og imbestigasyon niini kung unsay hinungdan sa paglayas sa suspetsado. (BANAT NEWS)