Pahimangno sa DA gituman sa katawhan

CEBU, Philippines - Kadaghanan sa mga mag-uuma  nakaamgo na  bahin  sa kamahinungdanon sa mga pahimangno sa Department of Agriculture Regional Office 7 (DA-7) kalabot sa hustong  pagkonsumo sa bugas.

Usa na niini mao si Diosdado Cahintong, 42,  minyo, may tulo ka anak ug lumad nga taga barangay Valencia ,lungsod sa Valencia, lalawigan sa Bohol. Si Cahintong  mibutyag sa Banat News nga  mapasalamaton  kaayo siya sa DA 7 tungod sa paghungit ning maong buhatan sa tinong impormasyon  nga angay tumanon  sa mga mag-uuma ug konsumedor alang sa pag-ugmad ug usab pagkonsumo og bugas humay.

Dugang pa niya nga sa ilang pamilya ila usab gayud nga gianad ang ilang kaugalingon sa pagdaginot og bugas diin kun sila mokaon, magsukad  sila  og kan-on  sa  plato nga  igo rang  kaunon  ugkinahanglang matilok  gayud,  ug  dili pasubrahan  nga dili  na  hinuon mahurot  og  kaon.

Miingon  siya  nga gidisiplina na nilang daan ang ilang kaugalingon nga kun aduna maymahabilin sa ilang  linuto nga  bugas,  ila gayud kining  i-recycle o lutoon  pag-usab  sama  sa  pagtsampurado niini o ba kaha lugawon .

Mipadayag gayud si Cahintong sa iyang dakong pasalamat ngadto sa tinubdan sa DA-7 tungod sa pag-umol niini og mga aktibidad ug programa nga may kalabotan sa pagdaginot og bugas.

Kini  tungod  kay  nalantawan  ni Cahintong  ngabisan tinuod  nga silang  mag-uuma ang nag-ugmad niini sa umahan hinungdan  nga  may  pagkaon  ang katawhan adlaw-adlaw apan angay ipatik usab  sa tawo sa iyang alimpatakan nga dili gayud sila ang tinud-anay nga nanag-iya niini tungod kay ang Dios gayud ang orihinal nga nanag-iya sa bugas, busa makatarunganon  lang  nga  angay kining amumahon ug dumalaon og tarong.

Sa bahin usab ni Regional Executive Director Angel C. Enriquez sa DA-7 siya miingon nga kinahanglan dili gayud sayon-sayonon og usik ang bugas humay tungod kay mao kini ang usa sa batakang panginahanglan sa tawo mao nga kinahanglan usab nga kamao ang katawhan moamping niini.

Gipadayag ni Enriquez atol sa bag-ohay pa lang gipahigayon nga paglusad sa National Year of Rice didto sa syudad sa Tagbilaran,  Bohol nga ang mga mag-uuma nga nag-ugmad og humayan kinahanglan usab nga mosagop sa ilang gipaila nga modernong teknolohiya alang sa pagpalambo sa ilang produksyon ug nga ang mga konsumedor kinahanglan nga aktibong modawat ug mosunod  kung unsa man ang mga pahimangno sa buhatan sa DA 7 tungod kay alang man gayud kini sa kalampusan sa gi-target dili lamang sa buhatan sa DA 7 kundi lakip na sa tanang mga magpapatigayon, mga konsumedor ug usab sa nasud.

Sumala pa ni Enriquez nga ang buhatan sa DA 7 dili gayud mohunong sa tim-os nga suporta niini ngadto sa mga mag-uuma ug nga ang mga mag-uuma kinahanglang mapasigarbohon sila sa ilang kaugalingon tungod kay kun wala sila, walay makaon ang katawhan. Gipanghinaot ni Enriquez nga unta makab-ot gayud ang kalampusan sa tanan nilang mga yangungo mahitungod sa pagdaginot ug sa pagdumala sa bugas humay. (BANAT NEWS)