CIDG mosusi sa sex video scandal

CEBU, Philippines - Mahimong makasohan ang lalaki diha sa sex scandal video kun ugaling mopasaka og reklamo ang babayeng tinun-an nga nabiktima sa pagkatap sa ilang gihimong sex video.

Kini maoy gipadayag ni Criminal Investigation and Detection Group-Regional Director Eddie Benigay nga nahinabi sa Banat News.

Matud pa sa opisyal nga sa iyang nakuhang impormasyon dunay tipik sa sex video nga susama sa nag-tutorial ang lalaki sa pribadong bahin sa babaye nga walay pagtugot niini.

Si Benigay mi-awhag sa babaye nga mahimo kining modangop kanila aron mopasaka og kaso batok sa iyang uyab nga nakaingon sa kauwawan sa iyang pagkatawo.

Gipasidan-an usab niini ang mga tawong adunay kopya sa maong sex video nga i-delete na lang kini ug dili na ipasa pa sa uban tungod kay posibleng mapasakaan sila og mga kasong paglapas sa Republic Act 9995  o Anti-Photo and Video Voyeurism Act diin nagdumili kini sa usa ka tawo sa pagkopya, reproduce, pagbaligya, pagpakatap sa illegal nga recorded video.

Butyag usab ni Benigay nga ang pagkatap karon sa maong sex video makapapriso sa nihimo niini.Gimando na sa CIDG ang pagpaniid sa mga namaligya og pirated DVDs ug CDs sa kadalanan kun si kinsay namaligya niini.

“Stop the spread of that video. I already gave instructions to my operatives to check the market and coordinate with OMB (Optical Media Board),” tipik sa text message nga gipadala ni Benigay sa Banat News.

Mipahimangno si Benigay sa kababayen-an nga ipabilin ang moralidad ug likayan nga malambigit sa mga buhat nga iya lang sa mga minyo.

Samtang sa habig sa simbahan, mipadayag usab si Msgr. Esteban Binghay ang Episcopal Vicar sa Cebu South Parishes sa diha nga nahinabi sa Banat News nga duha ang papel sa social media ug sa media.

Kini mao ang pagpakatap og mahinungdanong impormasyon apan ang ikaduha nagamit usab kini sa pagdaot sa ubang tawo.

“Kusog kaayo ang social networking, magamit ni sa maayong pamaagi pero makahimo sad ni’g dautan parehas anang Facebook, naay mga kawatan, naa nasay mga unfaithful husband and wife,” matud pa ni Binghay.

Matud pa ni Msgr. Binghay gikinahanglan gyud sa mga ginikanan ug mga magtutudlo nga i-edukar og maayo ug i-monitor ang kabataan tungod sa ka-moderno karon sa teknolohiya karun.

Samtang gihulagway ni Binghay nga ang tawong nagpakatap sa maong sex video walay konsensya.

Gituohang gibati og trauma ang mga tinun-an sa unibersidad nga giingong diin magtungha ang babaye sa video tungod sa kauwaw sa nahitabo.

Ang babaye sa maong sex video nagsuot og kompletong uniporme sa ilang tunghaan ug nagsuot usab og identification card. Gimando sa tagdumala sa maong tunghaan nga dili una nila suoton ang ilang uniporme. (/EIM)(BANAT NEWS)