Gwen sad-an sa Balili scandal

CEBU, Philippines - Namatud-ang sad-an sa kasong grave misconduct sila si suspendidong gob. Gwendolyn Garcia ug laing lima ka mga opisyal sa Kapitolyo may kalambigitan sa anomalosong pagpalit og luna sa mga Balili sa barangay Tinaan, dakbayan sa Naga.

Hinuon, sila si Garcia ug kanhi bokal Juan Bolo nakalingkawas na sa silot human napili pagbalik si Garcia niadtong 2010 samtang wala na usab sa posisyon si Bolo.

Apan ang mga akusado nga sila si Anthony Sususco, Roy Salubre ug Eulogio Pelayre, kinsa mga sakop sa Provincial Appraisal Committee ingon man sila si Emme Gingoyon, provincial budget officer, ang mag-atubang og silot sa pagkatangtang sa serbisyo.

Laing kasong kriminal ang giatubang karon sa mga sinumbong sa Sandiganbayan may kalambigitan gihapon sa maong transaksiyon.

Bag-ohay lang usab nga gibasura sa Ombudsman ang motion for reconsideration nga giduso ni Garcia ug kaubanan.

Apan matud pa ni Garcia nga gitun-an na sa iyang mga abogado ang sunod nga lakang nga ilang himoon sama sa pagdangop ngadto sa Korte Suprema.

“Limpyo kaayo ang akong konsensiya, gihimo ta kana alang sa kaayohan sa probinsiya, ato nang matubag ang tanan pangutana,” nagkanayun si Garcia sa sibyaanang DYHP kagahapon.

Si Garcia gipasakaan og duha ka kasong pagpangawkaw ug laing usa ka kasong illegal use of public funds sa anomalosong pagpalit sa 24.7 ektaryang luna sa mga Balili sa dakbayan sa Naga niadtong 2008 balor og P98.9 milyones.

Si Garcia gisilotan karon sa pagkasuspenso sulod sa unom ka buwan nunot usab sa laing kasong administratiba nga gipasaka ni anhing bise gob. Gregorio Sanchez Jr.  (BANAT NEWS)