2 Bata nalumos

CEBU, Philippines - Duha ka mga bata ang sunod nga nangalumos patay samtang nangaligo sa managlahing lugar didto sa dakbayan sa Talisay niadtong Domingo.

Ang unang insidenti nahitabo sa Boromeo Beach sa barangay Pooc sa siyudad sa Talisay alas- 2:00 sa hapon diin ang biktima mao si Julie-ann Prajes, 10,  taga Ilang-Ilang sa barangay Lagtang sa samang siyudad.

   Matud ni PO1 Joel Lopez sa Talisay City Police Station nga nahinabi sa Banat News kauban sa amahan ug mga paryente ang bata nga nangaligo sa maong beach resort  apan nataligam-an kini. Mao na lay ilahang nadiskitaan ang biktima nga naglutaw na kini sa dagat nga wala nay panimuot hinungdan nga dali nila kining gitabang ug gihatud sa Talisay City District Hospital apan patay na gyud kini.

Samtang pagkaalas 6:00 sa gabii sa susamang adlaw laing 9- anyos nga batang babaye ang nalumos patay usab sa usa ka sapa sa Campo Tres sa mao gihapong siyudad.

Ang biktima nailhan nga si Wisey Alipasqua, 9, tinun-an sa grade-3 ug ka-barangay ra sa unang nalumos nga bata.

Matud pa ang biktima kauban sa iyang mga higala nga mga bata nagkasabot nga mangaligo sa sapa sa maong lugar apan nalumos kini. Ang mga kaduwa na niini maoy mipahibalo sa mga ginikanan ni Alipasqua sa nahitabo.

Ang mga silingan sa biktima nga nagtinabangay sa pagpangita sa bata ug nakit-an kining naglutaw  na sa sapa ug dali nilang gidala sa Talisay City District Hospital apan gideklarar kini nga dead on arrival. (/EIM) (BANAT NEWS)