Bicycle Cops ipakatap sa Lapulapu

CEBU, Philippines - Mikabat sa 50 ka mga  polis gibansaybansay sa pagmaneho sa bisikleta nga maglangkob sa “Bicycle COP’s” sa dakbayan sa Lapulapu.

Matud pa ni Lapulapu City Police Director P/SSupt. Rey Lyndon Lawas nga duha ka trainor gikan sa Police Department sa San Francisco, California sa Estados Unidos ang mituyo sa pag-anhi sa dakbayan sa Lapulapu alang sa  pagbansay-bansay sa mga pulis.

Lakip sa maong pagbansaybansay ang “Operation Technique on Bike Patrol” diin dili lamang kutob nga mosakay sa bisikleta ang usa ka polis kundi lakip usab sa mga pamaagi sa paggukod ug pagsikop sa mga kriminal nga mogamit og  bisikleta.

Nahuman ang maong pagbansaybansay sa milabay’ng Sabado ug kini nagmalampuson diin dako og ikatabang sa ekonomiya ug sa panglawas ang makuha sa usa ka polis nga modala sa maong bike patrol.

Matud pa ni SSupt. Lawas ang tourist police maoy kasagaran nga ilang ipaubos sa pagbansaybansay alang sa seguridad sa mga bisita dinhi sa dakbayan sa Lapulapu.

Lakip sa bisitahon sa bike patrol mao ang mga hilit nga dapit sa dakbayan sa Lapulapu nga maoy kanunay   nga  hugpaan   sa mga krimen nga mahitabo.

Naglaraw si Lawas nga ipaabot ngadto sa mga kabarangayan ang pagbansaybansay sa mga barangay police sa mga pamaagi sa pagdala sa bike patrol.

 Sa pagkakaron adunay 20 ka mga bisikleta ang gigamit sa kapolisan diin 10 niini gihatag sa Korean Community sa dakbayan sa Lapulapu. (BANAT NEWS)