Tong collector misiaw

CEBU, Philippines - Ang ordinansa nga nagdili sa kalihukan sa mga tong collectors nga nagtakuban nga mga dispatchers ingon man ang mga mangilkilay nga kunohay mobantay sa mga sakyanan wala gayud magsilbi.

Maisip nga usik lang ang kahago sa mga konsehal sa dakbayan nga migahin og igo nga panahon sa pagdiskutir aron mamugna ang maong ordinansa apan karon gipasagdan ra og wala ipatuman.

Usa ka drayber og PUJ nga nagbiyahean sa Labangon miingon nga kun malooy si Mayor Michael Rama kanila nga mga draybers angay’ng sugoon niya ang mga polis nga paspasan ang pagpanakop niining mga tong kolektors.

Laing drayber miingon nga lisud alang kanila ang pagbalibad nga dili mohatag niining mga tong kolektors kay sigurado sila nga panimaslan, mahimong dili sila apan suyakan ang ilang mga sakyanan.

Usa ka lider og transport group dinhi sa Sugbo mitug-an nga kaniadto dunay drayber sa PUJ nga mihimo g’yud og reklamo ngadto sa kapolisan ug napasakaan og kaso ang pipila ka dispatchers apan gidunggab ang maong drayber.

Ilang gihandom nga usa ka opisyal sa City Hall nga aktibo kaayo nga manakop sa mga drayber ug misanta sa kalihukan sa mga tong kolektor diha sa Colon wala magdugay gipusil ug gipatay.

Gihulagway sa uban nga sindikato ang kalihukan sa mga tong kolektors kay may nagduda nga gipaluyohan kini sa pipila ka polis nga tigpangayoan kanila og bahin sa ilang makita.

Ang kapolisan dunay mga dinakpan sa mga malapason sa ordinansa nga nagdili sa mga tong kolektors apan wala kini makapahadlok sa maong mga tawo nga anaa nagpakabuhi sa karsada.

Usa ka tigpaminaw sa DYLA miingon nga gimingaw siya sa mga “vigilantes” nga mao ra’y gikahadlokan sa mga badlungon kay dili magpanuko pagtipi kanila tungod sa illegal nila nga kalihukan. (BANAT NEWS)