74-anyos nagbitay sa sanga sa Macopa

CEBU, Philippines - Patay nang napalgan sa kalibonan  ang  74-anyos nga lolo human kini maghikog  didto sa barangay Bagacay sa lungsod sa Sibonga, niadtong Sabado sa alas 9:20 sa gabii.

Ang nagbitay  mao si Eneroso Dela Torre, 74, byudo ug nagpuyo sa maong lugar. si SPO1 Bernard Oteda sa Sibonga Police Station mibutyag  sa Banat News nga ang biktima  milakaw nianang   alas 6:00 pa sa buntag ug wala na kini igkita nianang tibuok adlaw.

Gumikan niini ang mga kabanay sa biktima ni-report dayun sa buhatan sa kapolisan apan wala magdugay usa sa  ilang  mga  silingan  nga  si  Maximo Recapente, hingkod, maoy   nakadiskobre  sa maong  tiguwang  nga nagbitay  sa sanga  sa   kahoy  nga Macopa    nga wala nay kinabuhi.

Sa pagrespondi sa mga polis ilang nadiskobrihan ang  usa  ka suicide note duol sa patay’ng lawas niini nga nagkanayon “Pasayloa ku ninyo wala naku tuyo-a akong sala ug salamat nalang sa pagbantay ninyo naku..Rudy”.

Ang kabanay ni dela Torre  kombinsido nga tinuyo  niini  ang  paghikog  apan gitakda gihapon  nga ila kining  ipa ubos sa autopsy aron  sa pagtino kun wala bay posibling foul play ang maong hitabo. (Darrel A. Carumba/WC)

Mag-uuma  gibanhigan patay

Ni Darrel Carumba

Patay na nga nahidangat sa tambalanan ang usa ka mag-uuma human kini pusila  sa ulo sa  mibanhig  kaniya  didto sa  bukirang barangay sa Nug-as, lungsod sa Alcoy niadtong Sabado sa alas 2:20 sa hapon.

Ang biktima mao si Venerando Carungay, 20, ulitawo usa ka mag-uuma,  nga nagpuyo sa maong lugar.

Samtang sa paghikay niining maong balita wala pa matumbok sa kapolisan ang nagbinugtong nga kriminal nga mipatay  sa biktima.

Kini  tungod  sa kakuwang  sa  mga  saksi  nga  mao  untay  makatabang  sa pagsulbad  sa maong  kaso.

Si PO1 Howard Maynopas sa Alcoy Police Station  mibutyag  sa Banat News  nga segun sa pasiuna  nilang imbistigasyon, ilang nasuta nga ang biktima gikan sa tabo sa merkado sa barangay Nug-as. Paingon  na  kini  sa ilang  balay  ug  samtang  naglakaw  sa dalan  nga nag-inusara wala kini makabantay nga giatangan siya  sa kriminal nga wala  hiilhi.

Unya  wala  gyud ang-anga  sa pagpusil,  kay  gisiguro  gyud  ang  ulo  nga  maoy  hinungdan  sa diha-diha  nga  kamatayon  sa biktima. Human  mahagba  sa yuta  ang  biktima,  mibiya  usab  dayon  ang  kriminal  ug  ang  mga  tawo  na  nga nangagi  sa maong  lugar  mao  nay  nakadiskobre  sa biktima  nga naglunang  sa kaugalingon  niining  dugo  taliwala sa dalan.

Human  ikapahibawo  ngadto  sa mga  opisyal  sa barangay, ilang  gisakwat  ang  biktima  ug  gihatud  ngadto  sa Alcoy Health  Center diin  kini  ideklarar  nga  patay  na.

Ang kapolisan mibalik og tungas sa maong lugar kagahapon nga gipangunahan sa  ilang hepe  nga  si  Insp. Crisanto Abella aron pagpangapkap  og dugang inpormasyon nga magtumbok sa motibo sa maong krimen ug  pag-ila  sa kriminal. (BANAT NEWS)