Financier sa masiao sikop

CEBU, Philippines - Napriso  na ang ikaduha sa listahan sa mga  financier  sa masiao sa dakbayan sa Sugbo ug ang 26 ka mga usher niini human sila  masikop sa mga sakop  sa City Intelligence Branch sa may Limkaking Compound, sa  dalan  Gen. Maxilom Avenue sakop sa barangay Zapatera ning dakbayan  sa Sugbo  sa miaging  gabii.

Ang maong  financier nailhan nga si Edgar Lim, molupyo sa maong lugar ug giingong No. 2 sa listahan sa kapolisan sa mga iladong financier sa  illegal  nga  sugal  sa Sugbo.

Lakip usab sa nasikop mao ang 26 ka mga trabahante niini nga mga usher kinsa naaktohan usab nga nanglista.  Sa pakighinabi sa Banat News sa hepe sa CIB nga si Chief Insp. Romeo Santander, misaysay kini nga ang maong operasyon ilang  gilusad pinasikad sa usa ka search warrant nga gipirmahan ni RTC-Branch 12 Sylvia Singco.

Matud pa ni Santander nga dugay na silang nagmonitor sa maong financier hinungdan nga mikuha sila og search warrant aron masuta kun nagpaluyo ba gayud si Lim sa illegal nga sugal nga masiao.

Midugang si Santander nga didto sa usa ka kwarto sa balay  sa suspetsado ilang naaktohan ang 26 ka mga tawo nga nag-tally sa mga numero nga  gitambongan  usab  usab ni Lim kinsa  nag-atubang sa fax machine niadtong tungora.

Ang kapolisan daling misikop ni  Lim ug sa mga usher ug gumikan  sa kakalit, wala  kini  magpakita og aksyon nga mosukol  o  kaha  sa pag-ikyas  gikan  sa  mga  otoridad.

Matud pa ni Santander nga bisan pa man og nasikop na si Lim, dili gihapon sila mohunong sa ilang kampanya  batok  sa illegal  nga sugal hangtud  nga  madeklarar  ang  dakbayan  sa Sugbo  nga zero sa illegal number games.

Gani, miingon  si Santander  nga  sa pagkakaron mas gipahugtan  pa  nila  ang  ilang pagmonitor  o pagpaniid sa  mga  dagkong  tawo  nga  nagpaluyo ug nagpakatap sa mga illegal nga sugal dinhi  sa dakbayan.

Gipadayag usab ni Santander nga dili lang kay sa dakbayan sa Sugbo nagtuyok ang illegal nga sugal nga gipuhonanan ni Lim kundili  bisan  ngadto  sa kalungsoran  ning lalawigan nakalukop  na  kini.

Gibutyag usab ni Santander nga wala sila’y nasakmit nga kwarta tungod kay ilang nasuta nga bank-to-bank  diay ipaagi ang pag-remit sa mga coordinator  sa mga posta  niini.

Midugang  si Santander nga miangkon si Lim  nga taud-taod na siya sa maong negosyo ug gani, tungod niini   daghan siyang natabangan ug nahatagan og trabaho.

Nasakmit  sa kapolisan  ang usa ka calibre .9mm pistol nga adunay 6 ka buhing bala; usa ka SW .357 caliber nga adunay 5 ka buhing bala sa kalibre .38; duha ka Xerox machine; 16 ka fax machine; nagkadaiyang tally sheets ug uban pang mga paraphernalia sa illegal nga sugal.

  Sa nasayran, ang kapolisan walay hunong sa ilang kampanya batok sa illegal nga sugal ug tungod niini, subsob usab ang ilang pagpanakop og mga tawo nga nalambigit niini. (/WC)(BANAT NEWS)