Driver gikulata sa mga pasahero

CEBU, Philippines - Naputos sa bun-og ang lawas  sa  usa ka taxi driver human kini tabangi og kulata sa upat ka mga wala  hiilhing   batan-ong lalaki  nga  iyang  pasahero didto sa Brgy. Mactan dakbayan sa Lapulapu  sa miaging  gabii.

Ang biktima mao si Rolando Boyles, 40, minyo,  nga  taga   Brgy. Pajac, sa maong  dakbayan  ug usa ka taxi driver.

Matud pa ni Boyles nga   sa alas 8:30 sa milabay’ng gabii misakay kaniya ang upat ka batan-on  ug nagpahatod sa Brgy. Ibo kay magpraktis kini og sayaw  ug mipasalig  nga ang ilang choreographer maoy mobayad sa ilang plete.

Apan  sa pag-abot  nila  didto, wala  ang ilang choreographer, busa nagpahatod na  usab kini ngadto sa Brgy. Mactan kay ang iyaan sa usa ka suspek  maoy ilang pabayron sa plete. 

Apan nataymingan  nga wala  gihapon  didto  ang giingong iyaan   busa   mitumaw ang panaglalis kay nasuko  na  ang  driver hinungdan nga nanaug ang mga batan-on ug nanglakaw nga wala mobayad sa ilang plete.

Gigukod kini ni Boyles ang  maong  mga  pasahero apan dihang iya kining  gipaningil mihiwasa  kini sa kasuko ug gitabangan siya  og  kulata niini hinungdan  nga  nabulit  siya  sa  mga bun-og. Wala’y  nahimo  ang  biktima  gawas  sa pagtaho  niini  ngadto  sa kapolisan nga maoy  mihatud  kaniya ngadto  sa Mactan Doctor’s Hospital, samtang  padayon  pang  gipangita  sa  kapolisan  ang  mga mibun-og   kaniya.

Hinuon  ang  mga  tigpaniid  nagkanayon  nga  maayo  nalang  kay  kulata ra ang nahiagoman sa maong drayber  kay  sa gipatay  siya. (BANAT NEWS)