Magpale gideklarar nga persona non grata sa Barili

CEBU, Philippines - Gideklarar  usab  nga persona non grata  si acting  governor  ug usa  ka miyembro  sa hunta  probinsyal  sa lungsod  sa Barili.

Si  Vice  Mayor  Marlon  Garcia  kinsa  maoy  presiding officer  sa konseho  sa maong lungsod  nagkanayon  nga  dili  na  nila ilhon nga  higala  sila  si   Acting Gov.  Agnes Magpale ug 6th District board member Arleigh Jay Sitoy.

Kini naggumikan   sa padayon  nga  paggukod nila  ni  Magpale  ug  Sitoy  ni  suspended governor  Gwendolyn  Garcia.

Matud  pa  ni  Vice Mayor  Garcia  nga  ila  kining  gihimo  tungod  kay  dili  nila makalimtan  ang pagdaugdaug  ni Magpale  ug  Sitoy  sa iyang  isgoon  nga si Gwen.

Subay niini ilang gikondenar ang pagpasira sa acting gobernador sa buhatan ni Garcia lakip na ang dili makiangayon nga pagdili sa pagsulod og balik sa mga kawani sa gobernador sa buhatan niini sa Kapitolyo.

Sayo  niini  sila  si Magpale  ug Sitoy  gideklarar  usab  nga   persona non grata   sa lungsod sa Dumanjug tungod gihapon sa dili makiangayon nga pagpanggukod sa duha ngadto sa suspended  governor.

Samtang  sila  si Magpale  ug  Sitoy  nga  gikuhaan  og  reaction  sa  Banat News  igo  ra  nga miingon  nga natural lang  kini   nga  sa mga lugar  nga  ang  mga  opisyal  suod  nga kadugo  ug  ilabi  na  sa  mga igsoon  ni suspended  governor Garcia  dili  gyud  makabaton  og  maayong  pagtagad  ang  kasamtangang  gobernador  ug  mga kaubanan  niini. 

Apan  sumala pa ni Magpale  nga  dili baya  tingale tanang  tawo  sa Dumanjug  ug Barili mga dumadapig  sa  mga  Garcia. Midugang  siya  nga  kun  may  mga  suporter  man  si Garcia  didto  tungod  kay  iyang  mga  igsoon  ang  mga  dagkong  opisyal  sa  maong  mga lungsod, nagtuo  usab  si Magpale  nga  may  mga suporter  usab  siya    ug  si Sitoy  didto.

Hinuon  matud  pa  ni Magpale  nga wala siya  apektohi  niini. (BANAT NEWS)