Polis sa Talisay nagbansay-bansay

CEBU, Philippines -  Naalerto kagahapon sa buntag ang Talisay City Police Station tungod sa nahitabong negosasyon tali sa hostage taker apan ang maong kalihukan usa lang sa mga bansay-bansay sa mga angayang buhaton sa kapolisan kung dunay mahitabong samang insidente.

Ang maong bansay-bansay kagahapon pagpangandam sa kapolisan sa umaabot nga Annual General Inspection nga pagahimuon sa Camp Crame nga gikatakda karong Pebrero 4 hangtud 8, 2013 ngadto sa tanang mga police station o police headquarters.

Ang officer-in-charge sa Talisay City Police Station nga si Superintendent Elmer Lim sa pakighinabi niini sa Banat News kagahapon nagkanayon nga ang maong umaabot nga AGI niadto pa unta kining buwan sa Oktubre sa milabay’ng tuig apan tungod sa kadaghan sa mga okasyon wala kini mapahigayon ug giuswag na lang karong buwana.

Matud ni Lim nga kung napahigayon pa sa milabay’ng tuig ang maong AGI karong buwana unta ipahibalo kung kinsa nga mga police station ang napiling hatagan og pasidungog apan tungod sa sitwasyon nga naulahi na kini dili na kini kompetisyon.

Ang usang tumong sa AGI mao ang pagsukod sa abilidad ug kahanas sa kapolisan sa pagtubag sa tanang mga krimen o emerhensiyang  mahitabo.

Gibutyag ni Lim nga mikabat ngadto sa 18 ka mga senaryo ang naglangkub sa police operation apan dili kini mapahigayon tanan sa mga police station.

Ang kasagaran nga mapahigayon sa mga police station mao ang kumon nga gimbuhaton sama sa high risk check point o magpahigayon og hot pursuit operation, low risk check point o kumon nga check point nga pagahimuon diha sa kadalanan, technique sa pagpusas sa tawog gidakop, negosasyon tali sa hostage taker, crime scene investigation ug pagtubag og mga alarma.

Matud ni Lim nga labing dugay mokabat sa 10 minutos ang pagtubag sa kapolisan sa alarma apan kung ang alarmahan ngadto sa bukirang barangay o suoton mokabat ngadto sa 15 minutos.

Ang OIC nagkanayon nga duna siya’y nakitang mga gamay kaayong sipyat kagahapon sa ilang pagbansay-bansay apan dali na kaayo kini mausab.

Sa laing bahin, ang Talisay dunay mga bukirang barangay ug matud ni Lim nga nakigsabot siya sa mga kapitan sa mga barangay nga mag-organized sa ilang mga tanod nga maoy mo-roving diha sa ilang palibot.

Dunay bukirang barangay usab ang giplanohan ni Lim nga i-cluster aron matag adlaw dunay maka-roving niini nga mga tanod uban sa polis.

Ang OIC nagplano nga ang matag barangay dunay ibutang usa ka polis nga maoy mokuyog sa mga tanod nga mag-roving ug motubag sa mga alarma. (BANAT NEWS)